ۇلتتىق ۇلان ساپىندا تەك قۇقىقتىق ءتارتىپ ساقشىلارى عانا ەمەس، ناعىز چەمپيوندار دا بار.
سولاردىڭ ءبىرى – الماتى قالاسىندا ورنالاسقان ق ر ءىىم ۇلتتىق ۇلانىنىڭ 5571 اسكەري بولىمىندە مەرزىمدى قىزمەتىن اتقارىپ جۇرگەن قاتارداعى جاۋىنگەر الديار جاركەيەۆ، دەپ حابارلايدى aqshamnews.kz Polisia.kz-كە سىلتەمە جاساپ.
اسكەر قاتارىنا جەزقازعان قالاسىنان شاقىرتىلعان الديار – قازاقستاننىڭ ەكى دۇركىن چەمپيونى. ونىڭ ەسىمى قويان-قولتىق ۇرىس الەمىندە جاقسى تانىس. ول العاشقى ۇلكەن جەڭىستەرىنە اسكەرگە دەيىن قول جەتكىزگەن. 2021 جىلى قاراعاندىدا جەڭىل سالماق دارەجەسىندە جەڭىمپاز اتانسا، 2023 جىلى استانادا چەمپيوندىق اتاعىن قورعاپ شىقتى.
اسكەردەگى العاشقى كۇندەرىنەن-اق كومانديرلەر ونىڭ سپورتتىق الەۋەتىن بايقادى. بيىل تۇركىستان قالاسىندا وتكەن ۇلتتىق ۇلان اسكەري قىزمەتشىلەرى اراسىنداعى سپورتتىق جانە جاۋىنگەرلىك سامبودان وتكەن چەمپيوناتتا الديار "وڭتۇستىك" ءوڭق كومانداسىنىڭ نامىسىن قورعاپ، 70-تەن استام مىقتى سپورتشى قاتىسقان باسەكەدە 58 كەلى سالماق دارەجەسىندە كۇمىس جۇلدەنى ەنشىلەدى. بۇل جەتىستىك كەزدەيسوق ەمەس. الدياردىڭ سپورتقا دەگەن سۇيىسپەنشىلىك پەن جىگەرلى مىنەزى وتباسىندا قالىپتاسقان. ونىڭ اعالارى دا كەزىندە ۇلتتىق ۇلان ساپىندا مەرزىمدى اسكەري بورىشىن وتەپ، ىنىسىنە لايىقتى ۇلگى كورسەتتى. الايدا ۇلاندىقتىڭ اسكەري قىزمەتى تەك سپورتپەن شەكتەلمەيدى.
بۇگىندە ول الماتى كوشەلەرىندە پاترۋلدىك قىزمەت اتقارىپ، قوعامدىق ءتارتىپتى قاداعالاپ، مادەني جانە سپورتتىق ءىس-شارالاردا ازاماتتاردىڭ قاۋىپسىزدىگىن قامتاماسىز ەتەدى. كومانديرلەرى ونىڭ ءمىنسىز ءتارتىبى مەن باستاماشىلدىعىن ەرەكشە اتاپ وتەدى. ال قارۋلاستارى الدياردى سپورتتا دا، اسكەري قىزمەتتە دە ۇلگى بولارلىق ناعىز ۇلاندىق دەپ سانايدى.
– مەن ءۇشىن سپورت – ءومىر سالتى. اسكەردە جۇرسەم دە، جاتتىعۋدى جالعاستىرۋدامىن. اسكەردەگى قىزمەت دايىندىعىما ەش كەدەرگى كەلتىرمەي، قايتا ءتوزىمدى ءارى مىقتى بولۋعا كومەكتەسەدى، – دەيدى ول.
بۇل سوزدەر نەگىزگى ويدى ايشىقتاپ، ۇلتتىق ۇلانداعى قىزمەت – ەرلىك مەكتەبى عانا ەمەس، تۇلعا رەتىندە دامۋعا جول اشاتىن ورتا ەكەنىن دالەلدەيدى. مۇندا جاۋىنگەرلەرگە سەنىم ارتىپ، ولاردىڭ تالانتىن اشۋعا جانە جەتىستىككە جەتۋىنە قولداۋ كورسەتەدى. ويتكەنى اسكەري فورمانىڭ ارتىندا جاڭا بەلەستەردى باعىندىرۋعا تالپىنعان ادام بار.
اقپارات كوزى Polisia.kz سايتىندا: https://polisia.kz/qazaqstannyng-eki-durkin-chempiony-ulttyq-ulan-qatarynda-qyzmet-etedi/