2024–2025 وقۋ جىلىندا پەداگوگتەردى اتتەستاتتاۋ پروسەسى العاش رەت «ۇستاز» ۇلتتىق پلاتفورماسى ارقىلى تولىقتاي سيفرلىق فورماتتا جۇرگىزىلۋدە.
پلاتفورمادا مۇعالىمگە قاتىستى مالىمەتتەر بىرنەشە مەملەكەتتىك دەرەكقوردان اۆتوماتتى تۇردە الىنادى، دەپ حابارلايدى aqshamnews.kz.
قىزمەت ورنى، ەڭبەك ءوتىلى، ءبىلىم دەڭگەيى مەن جەتىستىكتەرى ءبىر جۇيەگە جيناقتالعان. سيفرلىق فورمات قاعازباستىلىقتى جويىپ، اتتەستاتتاۋدىڭ ءادىل ءارى اشىق وتۋىنە مۇمكىندىك بەردى.
ۇستازدىڭ پەداگوگيكالىق شەبەرلىگى تۋرالى دەرەكتەردى قاداعالاۋشى ماماندار باقىلاۋ پاراقتارىن تولىرىپ، ونى پەداگوگتىڭ جەكە پروفيلىنە جۇكتەيدى. ءار مامان ساباق قورىتىندىسىن ەلەكتروندىق سيفرلىق قولتاڭبا ارقىلى راستاپ، پەداگوگ ەڭبەگىنە ءادىل باعا بەرەدى. ال ءبىلىم ساپاسى، كاسىبي جەتىستىكتەر مەن بەلسەندىلىك بويىنشا دەرەكتەر ازىرگە ارنايى مودۋل ارقىلى قولمەن ەنگىزىلۋدە.
بۇگىندە پلاتفورمادا مەكتەپكە دەيىنگى، جالپى ورتا، ارنايى، قوسىمشا، تەحنيكالىق جانە كاسىپتىك ءبىلىم بەرۋ ۇيىمدارىنان 635 مىڭنان استام پەداگوگ تىركەلگەن. ولاردىڭ ىشىندە 94 مىڭنان استامى «پەداگوگ-مودەراتور» جانە «پەداگوگ-ساراپشى» ساناتتارى بويىنشا جۇيە ارقىلى اتتەستاسيادان وتۋدە.
بۇگىندە 66 مىڭعا (71%) جۋىق ءمۇعالىمنىڭ اتتەستاسيا قورىتىندىسى شىقتى. الداعى ۋاقىتتا وزگە دە بىلىكتىلىك ساناتتارى قامتىلىپ، سيفرلىق پلاتفورما اياسى كەزەڭ-كەزەڭىمەن كەڭەيتىلەدى