ماماندار وسى باعىتتا جاسالاتىن جۇمىستى تالقىلادى.
قازاقستان ۇكىمەتى مەملەكەتتىك دەنساۋلىق ساقتاۋ قىزمەتتەرىن كورسەتۋدىڭ ساپاسىن، تيىمدىلىگىن، قولجەتىمدىلىگى مەن ىڭعايلىلىعىن ارتتىرۋدى كوزدەپ وتىر، دەپ حابارلايدى Almaty-akshamy.kz.
وسى ماقساتتا دەنساۋلىق ساقتاۋ ءمينيسترى اجار عينيات سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسينمەن سالانى سيفرلاندىرۋدىڭ ءبىرقاتار باعىتى بويىنشا بىرلەسكەن جوبالاردى ىسكە اسىرۋ ماسەلەلەرىن تالقىلادى.
جيىندا پيلوتتىق ۇيىمداردا دەرەكتەردى جيناۋ مەن تالداۋدىڭ جانە پروسەستەردى باسقارۋدىڭ جاڭا تەحنولوگيالارىن ەنگىزۋ، مەديسينالىق بەينەلەردىڭ ورتالىقتاندىرىلعان قويماسىن قۇرۋ، سونداي-اق مەديسينالىق ۇيىمداردا تولىق قاعازسىز قۇجات اينالىمىنا تولىققاندى كوشۋ ماسەلەلەرى سارالاندى. بىرلەسكەن جوبالار كلينيكالىق حاتتامالاردى سيفرلاۋدى، قاجەتسىز نىساندار مەن تالاپتاردان ارىلۋدى كوزدەيدى.
مينيسترلەر مەديسيناداعى كوممۋنيكاسيا ارنالارىن كەڭەيتۋ تاقىرىبىن زەردەلەپ، دارى-دارمەك اينالىمى، مەديسينالىق قىزمەت جانە سانيتارلىق-ەپيدەميولوگيالىق باقىلاۋ سالالارىندا اۆتوماتتاندىرىلعان مەملەكەتتىك باقىلاۋ قۇرالدارىن ەنگىزۋ اسپەكتىلەرىن ەگجەي-تەگجەيلى تالقىلادى. قازاقستانداعى تەلەمەديسينانى دامىتۋ جانە دەنساۋلىقتى قاشىقتىقتان مونيتورينگىلەۋدى كەڭىنەن ەنگىزۋ ماڭىزى ەرەكشە اتاپ ءوتىلدى.
«قوس تاراپ رەسپۋبليكالىق ەلەكتروندىق دەنساۋلىق ساقتاۋ ورتالىعىن سدياوم-گە بەرۋ جانە سيفرلىق دەنساۋلىق ساقتاۋ سالاسىندا زاڭدى تۇلعا مارتەبەسىن بەرۋ تۋرالى شەشىم بويىنشا ورتاق پىكىرگە كەلدى. بۇل شەشىمنىڭ ارتىقشىلىعى - دەنساۋلىق ساقتاۋ سالاسىندا ورتالىق اقپاراتتىق حاب قۇرۋ جانە مەملەكەتتىك دەنساۋلىق ساقتاۋ قىزمەتتەرىن كورسەتۋدىڭ ساپاسىن، تيىمدىلىگىن، قولجەتىمدىلىگى مەن ىڭعايلىلىعىن ارتتىرۋ»، - دەلىنگەن دەنساۋلىق ساقتاۋ مينيسترلىگىنىڭ حابارلاماسىندا.
