قازاقستان گەرمانيا كومپانيالارىن ەلىمىزگە تارتۋ ءۇشىن قولايلى جاعداي جاساۋعا دايىن.
كەزدەسۋ بارىسىندا قازاقستان مەن گەرمانيا اراسىنداعى ساۋدا-ەكونوميكالىق جانە ينۆەستيسيالىق ىنتىماقتاستىق ماسەلەلەرى تالقىلاندى، دەپ حابارلايدى Almaty-akshamy.kz اقورلاعا سىلتەمە جاساپ.
مەملەكەت باسشىسى گەرمانيا ۇكىمەتى مەن بيزنەسى وكىلدەرىنە ءىلتيپات بىلدىرە وتىرىپ، ەلىمىز ەنەرگەتيكا، ونەركاسىپ، اۋىل شارۋاشىلىعى، كولىك جانە لوگيستيكا، ءبىلىم، عىلىم جانە تەحنيكالىق باعىتتاعى كادرلاردى دايارلاۋ سياقتى نەگىزگى سالالار بويىنشا سەرىكتەستىكتى تەرەڭدەتۋگە مۇددەلى ەكەنىن اتاپ ءوتتى. قازىرگى ۋاقىتتا ۇكىمەت 800 الەۋەتتى ينۆەستيسيالىق جوبادان قۇرالعان جوبالار پۋلىن ازىرلەدى. سونداي-اق قازاقستان گەرمانيا كومپانيالارىن ەلىمىزگە تارتۋ ءۇشىن قولايلى جاعداي جاساۋعا دايىن.
«گەرمانيا – قازاقستاننىڭ ەۋروپا وداعىنداعى ەڭ ماڭىزدى سەرىكتەسى. قازاقستاندا گەرمانيا كاپيتالىنىڭ ۇلەسى بار 600-دەن استام كاسىپورىن تابىستى جۇمىس ىستەپ جاتىر. ساۋدا-ساتتىقتى ارتتىرىپ، ينۆەستيسيا كولەمىن ۇلعايتۋ ءۇشىن مول الەۋەت بار»، – دەدى قاسىم-جومارت توقايەۆ.
سونىمەن قاتار پرەزيدەنت گەرمانيانىڭ تەحنيكالىق ماماندىقتار بويىنشا كادر دايارلاۋ تاجىريبەسىنە قىزىعۋشىلىق ءبىلدىردى. اتاپ ايتقاندا، قازاقستان وتاندىق مامانداردىڭ دەڭگەيىن كوتەرۋ ءۇشىن گەرمانيانىڭ تەحنيكالىق ينستيتۋتتارى وكىلدىكتەرىن، زەرتحانالارىن، عىلىمي جانە قۇزىرەت ورتالىقتارىن اشۋ مۇمكىندىگىن قاراستىرىپ جاتىر.
دەلەگاسيا باسشىسى قازاقستان مەن گەرمانيانىڭ ۇكىمەتارالىق كوميسسياسىنىڭ تەڭ ءتوراعاسى دومينيك شنيحەلس ەكى ەلدىڭ مەملەكەتتىك ورگاندارى مەن بيزنەس قۇرىلىمدارى اراسىنداعى ىس-ارەكەت دەڭگەيىنە جوعارى باعا بەردى. سونداي-اق ول گەرمانيالىق كومپانيالارمەن جۇمىس ىستەيتىن ۇكىمەتتەگى ارناۋلى توپتىڭ تيىمدىلىگىن اتاپ ءوتتى. دەلەگاسيا وكىلدەرى نەمىس بيزنەسى ترانسكاسپيي كولىك ءدالىزىن دامىتۋعا، كەن ورىندارىن يگەرۋگە جانە ەنەرگەتيكالىق سەكتورداعى ىنتىماقتاستىقتى نىعايتۋعا قىزىعۋشىلىق بىلدىرەتىنىن جەتكىزدى.