3 ناۋرىزدا الماتىدا «بەيبىتشىلىك پەن جاسامپازدىق جولىنداعى ىنتىماقتاستىق: قازاقستاننىڭ بۇۇ-نىڭ قۇرامىنا كىرۋىنىڭ 33 جىلدىعى جانە بۇۇ-نىڭ 80 جىلدىعى» اتتى عىلىمي-پراكتيكالىق كونفەرەنسيا ءوتتى. كونفەرەنسيا UN Plaza عيماراتىندا ق ر سىرتقى ىستەر مينيسترلىگى مەن بۇۇ-نىڭ قازاقستان رەسپۋبليكاسىنداعى تۇراقتى وكىلدىگ ۇيىمداستىردى.
2025 جىلى بۇۇ-نىڭ 80 جىلدىق مەرەيتويى الەم بويىنشا اتاپ وتىلۋدە. 1945 جىلى قۇرىلعان جاھاندىق ۇيىم الەمدە بەيبىتشىلىك پەن قاۋىپسىزدىكتى ساقتاۋدى ماقسات ەتەدى. ونى قۇرۋداعى باستى ماقسات سوعىستىڭ الدىن الۋ.
سونىمەن قاتار بيىل 2 ناۋرىزدا قازاقستاننىڭ بۇۇ-عا مۇشە بولعانىنا 33 جىل تولدى. سوعان وراي الماتى تورىندە الەمنىڭ ءتۇرلى ەلىنىڭ ديپلوماتتارى، ەلشىلەرى باس قوسقان القالى جيىن ۇيىمداستىرىلدى.
عىلىمي-پراكتيكالىق كونفەرەنسيانى بۇۇ-نىڭ قازاقستانداعى جاھاندىق كوممۋنيكاسيالار دەپارتامەنتىنىڭ وكىلى ۆلاستيميل سامەك جۇرگىزدى. ول ءوز ءسوزى بارىسىندا بۇۇ-نىڭ 80 جىلدىق مەرەيتويىمەن جانە قازاقستاننىڭ ۇيىمعا مۇشە اتانۋىنىڭ 33 جىلدىعىمەن قۇتتىقتادى. ول قازاقستاننىڭ الەمدىك قاۋىپسىزدىك پەن بەيبىتشىلىككە ۇلەسى وراسان زور ەكەنىن اتاپ ءوتتى.
ونىمەن بىرگە ۇستەلدىڭ تورىندە ەلىمىزدىڭ بۇرىنعى سىرتقى ىستەر ءمينيسترى، بۇۇ جانىنداعى قازاقستاننىڭ العاشقى تۇراقتى وكىلى اقمارال ارىستانبەكوۆا جانە قازاقستاننىڭ الماتى قالاسىنداعى ءسىم وكىلى جانىبەك ابدراشوۆ وتىردى. ا. ارىستانبەكوۆا ءوز سوزىندە ەلىمىزدىڭ حالىقارالىق قاۋىمداستىققا مۇشە بولعان العاشقى جىلداردى ەسكە الدى. سونىمەن قاتار ەلىمىزدىڭ بەيبىتشىلىك پەن قاۋىپسىزدىككە قوسقان ۇلەسى جايلى بايانداما جاسادى.
بۇدان بولەك ءسوز سويلەگەندەردىڭ ىشىندە قحر-دىڭ الماتىداعى باس كونسۋلى سزيان ۆەي، فرانسيانىڭ باس كونسۋلى فابريس نيەۆە، رف باس كونسۋلى دميتريي تۋرايەۆ بولدى. ولار الماتىدا ورتالىق ازيا مەن اۋعانستان ءۇشىن بۇۇ وڭىرلىك ورتالىعىن قۇرۋ جونىندەگى باستامانى قولدايتىنىن ايتتى. مۇنداي باستامانى مەملەكەت باسشىسى قاسىم-جومارت توقايەۆ ۇسىنعانىن ايتا كەتكەن ءجون.