الماتىدا وسىعان ورايلاستىرىلعان كەزدەسۋ ءوتتى
شارانى پان گي مۋن اتىنداعى تۇراقتى دامۋ ينستيتۋتى بۇۇ-نىڭ قازاقستانداعى اقپاراتتىق ورتالىعىنىڭ قولداۋىمەن قالا ستۋدەنتتەرى مەن جاستارى ءۇشىن ۇيىمداستىردى، دەپ حابارلايدى Almaty-akshamy.kz.
جيىنعا قاتىسۋشىلار الدىندا بۇۇ جاھاندىق كوممۋنيكاسيالار دەپارتامەنتىنىڭ قازاقستان رەسپۋبليكاسىنداعى وكىلى ۆلاستيميل سامەك ءسوز سويلەدى. قىزىقتى جانە ناتيجەلى اڭگىمە بارىسىندا حالىقارالىق ۇيىمنىڭ تاريحى، قىزمەتىنىڭ نەگىزگى باعىتتارى، جاھاندىق كۇن تارتىبىندەگى قازاقستانمەن ءوزارا ءىس-قيمىل، سونداي-اق تۇراقتى دامۋدا ۋنيۆەرسيتەتتەردىڭ ءعىلىمي-بىلىم بەرۋ ءرولى تۋرالى ماسەلەلەر قاراستىرىلدى.
شارانى ۇيىمداستىرۋشىلار مەرەيتوي جىلىندا پان گي مۋن اتىنداعى تۇراقتى دامۋ ينستيتۋتى اكادەميالىق قوعامداستىق ءۇشىن بۇۇ قىزمەتىنىڭ ءارتۇرلى باعىتتارى بويىنشا ءبىرقاتار كەزدەسۋلەر وتكىزۋ جوسپارلانىپ وتىرعانىن اتاپ ءوتتى.
«مەرەيتوي جىلى پان گي مۋن اتىنداعى تۇراقتى دامۋ ينستيتۋتى اكادەميالىق قوعامداستىق ءۇشىن بۇۇ قىزمەتىنىڭ ءارتۇرلى باعىتتارى بويىنشا ءبىرقاتار كەزدەسۋلەر وتكىزۋدى جوسپارلاپ وتىر. سونىمەن قاتار، جاقىن ارادا الماتىدا «بۇۇ مودەلى – جاڭا جىبەك جولى» حالىقارالىق ستۋدەنتتىك ويىنى وتەدى، وعان قازاقستاندىق جانە شەتەلدىك جوعارى وقۋ ورىندارىنىڭ وكىلدەرى قاتىسادى»، - دەدى ينستيتۋت ديرەكتورى ايجان سمايلوۆا.
سونداي-اق كەزدەسۋدە قازاقستاننىڭ بۇكىل تاۋەلسىزدىك كەزەڭىندە بۇۇ جۇيەسىمەن جەمىستى ءوزارا ءىس-قيمىل جاساپ، ۇيىم جارعىسىنىڭ ماقساتتارى مەن قاعيداتتارىنا تولىق ادالدىعىن كورسەتىپ كەلە جاتقانى ايتىلدى. پرەزيدەنت قاسىم-جومارت توقايەۆ اتاپ وتكەندەي: «30 جىل بۇرىن قازاقستان بۇۇ-نىڭ تولىققاندى مۇشەسى بولدى. ءبىز ۇيىممەن جاھاندىق قاۋىپسىزدىكتى قامتاماسىز ەتۋ جانە وركەنيەتتى قوعام قۇرۋ ماسەلەسىنە بايلانىستى ىنتىماقتاستىق ورناتتىق. گەوساياسي احۋال ۋشىعا تۇسكەن قازىرگى كەزدە وسى ۇيىمنىڭ الەۋەتى مەن ءرولىن ارتتىرا ءتۇسۋ كەرەك».
ەسكە سالا كەتەيىك، 1992 جىلى 2 ناۋرىزدا بىرىككەن ۇلتتار ۇيىمى باس اسسامبلەياسىنىڭ 46-سەسسياسىنىڭ قورىتىندىسى بويىنشا 46/224 قارارىمەن قازاقستان رەسپۋبليكاسى بۇۇ-نىڭ مۇشەلىگىنە ءبىراۋىزدان قابىلدانعان بولاتىن.