قازاقستان رەسپۋبليكاسىنىڭ ازەربايجان رەسپۋبليكاسىنداعى ەلشىسى ءالىم بايەل بۇگىن اقتاۋ قالاسى ماڭىندا ورىن العان ۇشاق اپاتىنان زارداپ شەككەندەردىڭ تەزىرەك ساۋىعىپ كەتۋىن تىلەكتەستىك ءبىلدىرىپ، الەۋمەتتىك جەلىدەگى پاراقشاسىنا جازدى، دەپ حابارلايدى aqshamnews.kz
"اقتاۋداعى ۇشاق اپاتى تۋرالى سۋىت حاباردى تەرەڭ كۇيزەلىسپەن قابىل الدىم. قازاقستان رەسپۋبليكاسىنىڭ ازەربايجان رەسپۋبليكاسىنداعى ەلشىلىگىنىڭ اتىنان قازا تاپقانداردىڭ جاقىندارىنا كوڭىل ايتامىن. جاندارى ءجانناتتا بولسىن! زارداپ شەككەندەردىڭ تەز ساۋىعىپ كەتۋىن تىلەيمىن!
قازاقستان پرەزيدەنتى قاسىم-جومارت توقايەۆتىڭ تاپسىرماسىمەن ۇشاق اپاتىنىڭ سەبەپتەرىن انىقتاۋ جانە ءبىرىنشى كەزەكتەگى كومەكتى كورسەتۋ ءۇشىن ۇكىمەتتىك كوميسسيا جۇمىس ىستەۋدە. ەكى ەلدىڭ قۇزىرەتتى ورگاندارى بىرگە بارلىق قاجەتتى شارالاردى اتقارۋدا. قازاقستاننىڭ مەديسينالىق مەكەمەلەرى ءتيىستى جاردەمدى كورسەتۋدە. اقتاۋ قالاسىنىڭ كوپتەگەن جاناشىر تۇرعىندارى زارداپ شەككەندەر ءۇشىن قان تاپسىرۋدا. قازاقستاندىقتار ازەربايجاننىڭ ەلشىلىگى مەن باس كونسۋلدىعىنا گۇل شوقتارىن اپارۋدا. قازاقستاننىڭ باكۋداعى ەلشىلىگىندە تۋ تومەن ءتۇسىرىلدى.
قازاقستان مەن ازەربايجان بۇل سىناقتان باۋىرلاستىق پەن ءوزارا كومەك رۋحىندا وتەتىنىنە سەنىمدىمىن. ءبىز بىرگەمىز..."
قازاقستاننىڭ ازەربايجانداعى ەلشىسى ءالىم بايەل