قازاقستاننىڭ اۆتوموبيل ونەركاسىبى تۇراقتى ءوسىمدى جانە كومپونەنتتىك بازانىڭ بەلسەندى دامۋىن كورسەتۋدە. 2024 جىلدىڭ قورىتىندىسى بويىنشا سالا كاسىپورىندارى 145 290 بىرلىك تەحنيكا شىعاردى، ونىڭ ىشىندە 134 مىڭ جەڭىل اۆتوكولىك، 7 705 جۇك كولىگى، 2 942 اۆتوبۋس جانە 665 بىرلىك ارنايى تەحنيكا.
2025 جىلدىڭ العاشقى ءتورت ايىندا ءوندىرىس كولەمى 45 628 بىرلىكتى قۇرادى — بۇل وتكەن جىلدىڭ سايكەس كەزەڭىمەن سالىستىرعاندا (22 583 بىرلىك) ەكى ەسەگە جۋىق ارتىق.
بۇگىندە قازاقستاندا اۆتوكولىك وندىرەتىن سەگىز ءىرى كاسىپورىن جۇمىس ىستەيدى: قوستاناي قالاسىنداعى «سارىاركااۆتوپروم» ج ش س (Allur)، ساران قالاسىنداعى «QazTehna» ج ش س، الماتى قالاسىنداعى «Hyundai Trans Kazakhstan» ج ش س جانە «Hyundai Trans Auto» ج ش س، سەمەي قالاسىنداعى «سەماز» ج ش س جانە «Daewoo Bus Kazakhstan» ج ش س، كوكشەتاۋ قالاسىنداعى «كاماز-ينجينيرينگ» اق، جانە ورال قالاسىنداعى «ۋرالسكاگرورەمماش» اق.
سالادا اۆتوكومپونەنتتىك بازاعا ەرەكشە كوڭىل بولىنۋدە. 2024 جىلى ساران قالاسىندا Tengri Tyres شينا زاۋىتى ىسكە قوسىلىپ، الماتىدا Kazakhstan Mobility Engineering زاۋىتى (مۋلتيمەديالىق جۇيەلەر ءوندىرىسى) جانە Almaty Autoparts Production زاۋىتى (اۆتوورىندىقتار ءوندىرىسى) اشىلدى.
«QazTehna» ج ش س شاناق بولشەكتەرىن شتامپتايتىن جابدىقتى جەتكىزۋگە كەلىسىمشارت جاسادى، ال «Qarmet» اق بازاسىندا اۆتوكولىك بولاتىن شىعارۋ جوسپارلانىپ وتىر. بۇل جوبالار جۇزدەگەن جاڭا جۇمىس ورنىن اشۋعا مۇمكىندىك بەرەدى جانە سالانىڭ تەحنولوگيالىق الەۋەتىن ارتتىرادى.