قازاقستاننىڭ اسكەري تەڭىزشىلەرى كاسىبي مەرەكەسىن اتاپ وتۋدە

1993 جىلعى ەكىنشى ساۋىردە پرەزيدەنتتىڭ جارلىعىمەن قازاقستان رەسپۋبليكاسىنىڭ اسكەري-تەڭىز كۇشتەرى قۇرىلدى.   

قارۋلى كۇشتەردىڭ بۇل اسكەر ءتۇرى باتىس ستراتەگيالىق باعىتىندا قول سۇعىلماۋشىلىقتى، ەلىمىزدىڭ اۋماقتىق تۇتاستىعىن قورعاۋعا ارنالعان، دەپ حابارلايدى Almaty-akshamy.kz.

اسكەري-تەڭىز كۇشتەرى تەڭىزدە ءجۇزۋدىڭ ناۆيگاسيالىق-گيدروگرافيالىق قاۋىپسىزدىگىن قامتاماسىز ەتەدى، توتەنشە جاعدايلار مينيسترلىگىنىڭ قىزمەتتەرىمەن بىرگە ىزدەستىرۋ-قۇتقارۋ جۇمىستارىن جۇرگىزەدى، مەملەكەتتىك ورگاندارعا تابيعاتتى قورعاۋ جانە باقىلاۋ فۋنكسيالارىن جۇزەگە اسىرۋ كەزىندە كومەك كورسەتەدى.

قازىرگى كەزەڭدە اسكەري-تەڭىز كۇشتەرىنە جاعالاۋداعى بايلانىس، تەڭىز جاياۋ اسكەرلەرى، ارنايى ماقساتتاعى جانە قامتاماسىز ەتۋ بولىمشەلەرى كىرەدى. اسكەري كورابلدەر زاماناۋي قارۋ-جاراقپەن جاساقتالعان. 

بيىلعى جىلعا «بىرلەستىك-2024» وقۋ-جاتتىعۋىن وتكىزۋ جوسپارلانعان، ونىڭ بارىسىندا تەڭىزدەگى كورىنىستەر، دەسانت ءتۇسىرۋ، بىرلەسكەن ارتيللەريالىق اتىستار مەن جاۋىنگەرلىك جاتتىعۋلار پىسىقتالادى. 

اسكەري-تەڭىز كۇشتەرىنىڭ قۇرامىندا وتاندىق جانە شەتەلدىك سوڭعى ۇلگىدەگى كورابلدەر بار. ەلدىڭ قورعانىس-ونەركاسىپتىك كەشەنى بۇل اسكەردى زاماناۋي تەحنيكامەن قامتاماسىز ەتەدى. 

بىلتىردان بەرى اۋە قورعانىسى كۇشتەرىنىڭ اسكەري ينستيتۋتىندا اسكەري تەڭىزشىلەردى «اسكەري ىستەگى تەڭىز تەحنيكاسى جانە تەحنولوگيالار» ماماندىعى بويىنشا دايارلاۋ جۇزەگە اسىرىلۋدا. تەڭىز ماماندىعىنىڭ نەگىزدەرىن بولاشاق شتۋرماندار مەن مەحانيكتەر اقتوبە اسكەري وقۋ ورنىنداعى اسكەري-تەڭىز پاندەرى كافەدراسىندا، ال بەيىندىك پاندەردى ۇشىنشى-بەسىنشى كۋرستاردا – اقتاۋ قالاسىنىڭ ش. ەسەنوۆ اتىنداعى كاسپيي تەحنولوگيالار جانە ينجينيرينگ ۋنيۆەرسيتەتىنىڭ بازاسىندا مەڭگەرەدى. اسكەري تەڭىزشىلەردى اقتاۋ ق. اسكەري-تەڭىز كۇشتەرىنىڭ وقۋ-جاتتىعۋ ورتالىعىندا دا وقىتادى، وندا جاس بۋىن كورابل قىزمەتىنىڭ ۇيىمداستىرىلۋىمەن جانە ولاردىڭ قۇرىلىسىمەن تانىسادى. 

اسكەري-تەڭىز كۇشتەرى وفيسەرلەرىنىڭ بىلىكتىلىگىن ارتتىرۋ جانە وقىتۋ – گەرمانيا، جۇڭگو، رەسەي، اقش، تۇركيا جانە وڭتۇستىك كورەيانىڭ جەتەكشى اسكەري وقۋ ورىندارىندا ۇيىمداستىرىلادى.

كاسىبي شەبەرلىك، جانقيارلىق قىزمەت جانە رۋحتىڭ بەرىكتىگى – اسكەري تەڭىزشىلەردى ەرەكشەلەيتىن قاسيەتتەر. ولارعا ەلدىڭ بىرلىگىن، اۋماقتىق تۇتاستىعىن جانە ەكونوميكالىق مۇددەلەردى قورعاۋ جونىندە اسا جاۋاپتى مىندەتتەر جۇكتەلگەن.