بۇگىن – اسكەري-عىلىمي قىزمەتكەرلەر مەن اسكەري پەداگوگ كۇنى. بۇل كۇن قورعانىس ءمينيسترىنىڭ 1997 جىلعى 24 قاراشاداعى «قارۋلى كۇشتەر ءۇشىن عىلىمي-پەداگوگيكالىق جانە عىلىمي كادرلار دايارلاۋ تۋرالى» بۇيرىعىنىڭ قابىلدانۋىمەن تىكەلەي بايلانىستى.
اسكەري بەيىندەگى جوعارى بىلىكتى ماماندار دايىنداۋ مەملەكەتتىڭ قورعانىس قابىلەتىن قامتاماسىز ەتۋ ىسىندە ۇلكەن ماڭىزعا يە. ول توعىز اسكەري وقۋ ورنىن قامتيتىن وتاندىق اسكەري ءبىلىم بەرۋ جۇيەسى شەڭبەرىندە جۇزەگە اسىرىلادى. ولاردىڭ بارلىعى ەلدىڭ ءبىلىم بەرۋ كەڭىستىگىنىڭ ءبىرىڭعاي نورماتيۆتىك-قۇقىقتىق جانە وقۋ-ادىستەمەلىك سالاسىندا جۇمىس ىستەيدى، دەپ حابارلايدى Almaty-akshamy.kz. قورعانىس مينيسترلىگىنە سىلتەمە جاساپ.
قورعانىس مينيسترلىگىنىڭ اسكەري ءبىلىم جانە عىلىم دەپارتامەنتى وسى سالاداعى ۇيلەستىرۋشى ورگان بولىپ تابىلادى. ونىڭ قۇزىرەتىنە قارۋلى كۇشتەر ءۇشىن كاسىبي كادرلاردى دايىنداۋ، اسكەرلەردىڭ جاۋىنگەرلىك جانە جۇمىلدىرۋ دايىندىعى مىندەتتەرىن ويداعىداي شەشۋگە مۇمكىندىك بەرەتىن اسكەري كادرلاردى دايىنداۋ دەڭگەيىن قامتاماسىز ەتۋ كىرەدى.
دەپارتامەنت وتاندىق اسكەري-عىلىمي مەكتەپتى نىعايتۋ جانە پروفەسسورلىق-وقىتۋشىلار قۇرامىنىڭ دارەجەلىلىگىن ارتتىرۋ بويىنشا جۇمىس جۇرگىزەدى.
«جالپى اسكەري ءبىلىم بەرۋ جۇيەسى مامانداردى دايىنداۋ ساپاسىن ارتتىرۋعا، وقىتۋدىڭ جاڭا باعىتتارىن اشۋعا، يننوۆاسيالاردى ەنگىزۋگە جانە عىلىمي-زەرتتەۋ ورتاسىنا ينتەگراسيالاۋعا باعىتتالعان. ول ءۇشىن قورعانىس ۆەدومستۆوسىندا اسكەري عىلىمدى ساپالى جاڭا دەڭگەيگە شىعارۋعا مۇمكىندىك بەرەتىن قورعانىس جانە عىلىمي زەرتتەۋلەر جۇرگىزۋدىڭ جاڭارتىلعان مودەلى قالىپتاسىپ، ىسكە اسىرىلۋدا»، – دەپ اتاپ ءوتتى اسكەري ءبىلىم جانە عىلىم دەپارتامەنتىنىڭ باستىعى، اسكەري عىلىمدار دوكتورى، پروفەسسور گەنەرال-مايور جۇمابەك احمەتوۆ.
بۇگىنگى تاڭدا پەداگوگيكالىق، عىلىمي-زەرتتەۋ جانە ونەرتاپقىشتىق كورپۋس 10 عىلىم دوكتورى، 53 فيلوسوفيا دوكتورى (PhD) جانە 48 عىلىم كانديداتىنان تۇرادى. اسكەري عالىمداردىڭ ونەرتابىستارى مەن پايدالى تەحنيكالىق مودەلدەرىنە بەرىلگەن 7 پاتەنتى، اۆتورلىق قۇقىق جانە زياتكەرلىك مەنشىك تۋرالى 23 كۋالىگى بار.
2021 جىلدان 2022 جىلعا دەيىن ولار 9 وقۋ قۇرالىن، وقۋ پروسەسىندە پايدالانىلاتىن 15 مونوگرافيانى باسىپ شىعاردى. 240-تان استام عىلىمي ماقالا، ونىڭ ىشىندە 44ء-ى شەتەلدىك باسىلىمداردا جاريالاندى. گرانتتىق جانە 2-باعدارلامالىق-نىسانالى قارجىلاندىرۋ شەڭبەرىندە 14 عىلىمي-زەرتتەۋ جوباسى ىسكە اسىرىلۋدا.