الماتى قالاسىنىڭ اكىمى دارحان ساتىبالدى بوستاندىق اۋدانىنداعى «دوستىق» ساياباعىندا وتكەن «تازا قازاقستان» رەسپۋبليكالىق ەكولوگيالىق اكسياسى اياسىنداعى اعاش وتىرعىزۋ ءىس-شاراسىنا قاتىستى.
اكسياعا قالالىق ءماسليحات دەپۋتاتتارى، باسقارما قىزمەتكەرلەرى، ەرىكتىلەر جانە بەلسەندى جاستار قاتىستى.
ءىس-شارا بارىسىندا «دوستىق» ساياباعىندا 50 اعاش وتىرعىزىلدى، ونىڭ ىشىندە 10 قاراعاي، 40 ۇيەڭكى، 40 جوكە، سونداي-اق 130 بۇتا مەن 50 شارشى مەتر اۋماققا قىزعالداق تۇقىمى ەگىلدى. كوشەتتەر كوممۋنالدىق قىزمەت وكىلدەرىنىڭ، جاستار ۇيىمدارىنىڭ جانە اۋدان تۇرعىندارىنىڭ قاتىسۋىمەن ارنايى دايىندالعان اۋماقتاردا ەگىلدى.
دارحان ساتىبالدى ەكولوگيالىق مادەنيەتتى قالىپتاستىرۋ مەن قورشاعان ورتاعا جاۋاپتى كوزقاراس تاربيەلەۋ «تازا قازاقستان» باعدارلاماسىنىڭ باستى باعىتتارىنىڭ ءبىرى ەكەنىن اتاپ ءوتتى.
«الماتى ەجەلدەن ەلىمىزدەگى ەڭ جاسىل قالا سانالادى. بۇل مارتەبەنى ساقتاۋ ءۇشىن ءار تۇرعىن تۇراقتى تۇردە قامقورلىق كورسەتىپ، اتسالىسۋى قاجەت. ەكولوگيالىق مادەنيەت ۇلگى كورسەتۋ مەن ورتاق ىسكە قاتىسۋ ارقىلى قالىپتاسادى. مىسالى، اعاش وتىرعىزۋ مەن قالانى اباتتاندىرۋ سەكىلدى ءىس-شارالار ارقىلى»، — دەدى قالا اكىمى.
پرەزيدەنت باستاماسىمەن جۇزەگە اسىرىلىپ جاتقان «تازا قازاقستان» باعدارلاماسى ەكولوگيالىق سانا قالىپتاستىرۋعا جانە ەلدى مەكەندەردىڭ سانيتارلىق جاعدايىن جاقسارتۋعا باعىتتالعان.
باعدارلاما اياسىندا الماتىدا جۇيەلى تۇردە كوگالداندىرۋ جانە اباتتاندىرۋ جۇمىستارى جۇرگىزىلۋدە. 2025 جىلدىڭ باسىنان بەرى 31 مىڭنان استام جاسىل جەلەك وتىرعىزىلدى، ونىڭ ىشىندە بيىكتىگى 6 مەتردەن اساتىن 2 مىڭ ءىرى كولەمدى اعاش بار. سونداي-اق، پلاستيك پەن اليۋمينيي قالدىقتارىن قابىلدايتىن فاندوماتتار ورناتىلىپ، جارامدىلىق مەرزىمى وتكەن دارىلەردى جيناۋ جانە تۇرمىستىق قالدىقتاردى بولەك جيناۋ اكسيالارى ۇيىمداستىرىلىپ كەلەدى.
اكسيا وتكەن «دوستىق» ساياباعى بوستاندىق اۋدانىندا، تيميريازيەۆ كوشەسىنىڭ بويىندا، شاشكين كوشەسىنىڭ باتىس جاعىندا ورنالاسقان. جالپى اۋماعى – 3،4 گەكتار، ونىڭ 2،8 گەكتارى جاسىل ايماق. 2020 جىلى ساياباقتا كەڭ اۋقىمدى جاڭارتۋ جۇمىسى جۇرگىزىلىپ، ول تۇرعىنداردىڭ سۇيىكتى دەمالىس ورىندارىنىڭ بىرىنە اينالدى.