ولار قوعامدىق نەگىزدە جۇمىس ىستەيدى.
قازاقستاننىڭ 16 وڭىرىندە بالا قۇقىقتارى جونىندەگى ۋاكىلدەر تاعايىندالدى. ولاردىڭ قاتارىندا ۇكىمەتتىك ەمەس ۇيىمدار مەن قوعامدىق بىرلەستىكتەردىڭ جەتەكشىلەرى، بالالار قۇقىعىن قورعاۋدا تاجىريبەسى بار ازاماتتار بار، دەپ حابارلايدى Almaty-akshamy.kz قازاقپاراتقا سىلتەمە جاساپ.
ەندى بالانىڭ قۇقىقتارى مەن مۇددەلەرى بۇزىلعان جاعدايدا اتا-انالار، بالالار جانە باسقا دا كەز كەلگەن ازاماتتار ءوز ايماعىنداعى ۋاكىلدىڭ كومەگىنە جۇگىنە الادى.
كانديداتتار وبلىس پەن رەسپۋبليكالىق ماڭىزى بار قالا اكىمدەرىنىڭ شەشىمىمەن تاعايىندالادى.
بالا قۇقىقتارى جونىندەگى ۋاكىل بالانىڭ قۇقىقتارى مەن زاڭدى مۇددەلەرىنىڭ بۇزىلۋى تۋرالى وتىنىشتەردى، جەرگىلىكتى اتقارۋشى ورگانداردىڭ جانە وزگە دە ۇيىمداردىڭ ارەكەتتەرىنە نەمەسە ارەكەتسىزدىگىنە قاتىستى شاعىمداردى قارايدى.
ولار سونداي-اق بالالاردى قورعاۋ سالاسىنداعى ماسەلەلەردى شەشۋگە ارنالعان زاڭ جوبالارىن ىلگەرىلەتۋگە قاتىسادى.
سونىمەن قاتار بالا قۇقىقتارى جونىندەگى ومبۋدسمەندەر بالالارعا ارنالعان ۇيىمدارعا كەدەرگىسىز كىرە الادى. سونداي-اق ولار قوعامدىق نەگىزدە جۇمىس ىستەيدى.
«نۇر-سۇلتان جانە شىمكەنت قالالارىندا، سونداي-اق ماڭعىستاۋ، تۇركىستان، اقتوبە، شىعىس قازاقستان، قوستاناي، باتىس قازاقستان، جەتىسۋ، جامبىل، پاۆلودار، قاراعاندى، سولتۇستىك قازاقستان، اقمولا، اباي، الماتى وبلىستارىندا بالالاردىڭ قۇقىقتارىن قورعاۋ جونىندەگى ۋاكىلدەر تاعايىندالدى. ال قالعان 4 وبلىستا كانديداتتار ءتىزىمى ءالى قارالىپ جاتىر. ءبىز كوميتەت وكىلدەرى رەتىندە بالالاردىڭ قۇقىقتارىن قورعاۋ جونىندەگى ۋاكىلدەرمەن بەلسەندى جۇمىس ىستەيمىز» ، - دەدى وقۋ-اعارتۋ مينيسترلىگى بالا قۇقىعىن قورعاۋ كوميتەتى ءتوراعاسىنىڭ ورىنباسارى ەلينا پاۋلي.