ولار رەسپۋبليكامىزدىڭ پاريجدەگى ەلشىلىگىندە باس قوسىپ، وسى ايدىڭ باسىندا مەملەكەت باسشىسى جاريالاعان رەفورمالار بويىنشا وي-پىكىر الماستى.
قازاقستان پرەزيدەنتى ۇسىنعان جاڭا قازاقستان تۇجىرىمداماسىنا ەۋرووداقتاعىلار ايرىقشا نازار اۋدارىپ وتىر. مىسالى، ايتۋلارىنشا، رەفورمالار ينۆەستورلار ءۇشىن تۇراقتىلىق كەپىلى بولىپ تابىلادى. سونداي-اق، مەملەكەتتىڭ دەموكراتيا قۇندىلىقتارىن قولدايتىنى جانە وسى باعىتتاعى رەفورمالاردى ودان ارى جالعاستىراتىنى ادام قۇقىقتارىن ساقتاۋ مەن ساياسي ورلەۋ باعدارىن ايقىنداپ وتىر، دەيدى ساراپشىلار. الايدا باتىل جوسپارلاردى جۇزەگە اسىرۋ ءۇشىن قازاقستاندىقتارعا جۇدىرىقتاي جۇمىلۋ قاجەت، دەيدى ولار.
«ءبىز سياقتى شەتەلدىك ينۆەستورلار تۇراقتىلىقتى قالايدى. تەك پرەزيدەنت جولداۋى كەزىندە عانا ەمەس، جالپى، قازاقستانداعى احۋالدان ۇنەمى حاباردارمىز. ويتكەنى ەل اۋماعىندا ۇزاق ۋاقىت جۇمىس جۇرگىزۋگە نيەتتىمىز. جاڭا جوبالار بويىنشا جاۋاپكەرشىلىگىمىز بار، جاڭا ارىپتەستەرمەن ىنتىماقتاستىق ورناتىپ جاتىرمىز. ەلدەگى وڭ وزگەرىستەردى فرانسيا ۇكىمەتىنىڭ وكىلدەرى قازاقستانعا بارىپ، ءوز كوزىمەن كورە الادى»، - Orano كومپانيالار توبىنىڭ ۆيسە-پرەزيدەنتى پول ماريا.
«قازاقستان ۇلكەن جاڭارۋ مەن ترانسفورماسيانىڭ الدىندا تۇر. بۇل ورتالىق ازيا ايماعى ءۇشىن ەرەكشە وقيعا. جانە دە سىزدەردەگى رەفورمالار ءسوز جۇزىندە عانا ەمەس، ءىس جۇزىندە دە ورىندالىپ جاتقانىنا كۋامىز»، - دەدى گەوساياسي جۋرنالدىڭ باس رەداكتورى جان-باتيست نوە.
«پرەزيدەنت 16 ناۋرىزدا جاڭا قازاقستان تۇجىرىمداماسىن تانىستىردى، ال 1 قىركۇيەكتە ادىلەتتى قازاقستان تۋرالى ايتىپ، الەۋمەتتىك جانە ساياسي باسىمدىقتارعا ءمان بەرىلگەن جاڭا رەفورمالاردى جاريالادى. پرەزيدەنتتەرىڭىز ساياسي اپپاراتتى جەتىلدىرۋ، بيلىك تاجىريبەسىن جاقسارتۋ باعىتىندا ناقتى شارالار جۇزەگە اساتىنىن جاريالادى»، - دەدى Ifri فرانسيانىڭ حالىقارالىق قاتىناستار ينستيتۋتىنىڭ زەرتتەۋشىسى ميكاەل ليەۆيستون.