بۇيرىق ازىرلەندى
كومىردى قازاقستاننان تىس جەرلەرگە اۆتوكولىكپەن شىعارۋعا تىيىم سالاتىن بۇيرىق ازىرلەندى. بۇل تۋرالى ق ر يندۋستريا جانە ينفراقۇرىلىمدىق دامۋ مينيسترلىگى يندۋستريالىق دامۋ كوميتەتىنىڭ ءتوراعاسى ءىلياس وسپانوۆ ايتىپ بەردى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«وتكەن جىلىتۋ ماۋسىمىندا كومىردى رەسپۋبليكادان تىس جەرلەرگە شىعارۋ فاكتىلەرى بايقالدى. مۇندا بيرجا ارقىلى ۇسىنۋ جولىمەن الاتىن، حالىق ءۇشىن ارنايى باعا بەلگىلەنگەن كومىر بار ەكەنىن ايتا كەتەيىن. ءبىراق وتكەن جىلى كومىردىڭ ەداۋىر كولەمى ارنايى باعامەن ەل اۋماعىنان تىس كەتكەنى تۋرالى فاكتىلەر انىقتالدى»، - دەدى ءىلياس وسپانوۆ ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا.
جامبىل وبلىسى اكىمدىگىنىڭ دەرەگىنە سايكەس، وتكەن جىلى «ايشا ءبيبى»، «سىپاتاي باتىر»، «قاراسۋ» كەدەن بەكەتتەرى ارقىلى قىرعىزستانعا شامامەن 120 مىڭ توننا كومىر شىعارىلعان.
«كومىردى ەلدەن اكەتۋ ءالى دە جالعاسۋدا. مەركى اۋدانى تۇرعىندارىنىڭ اقپاراتى بويىنشا، كومىر ساتۋ ورىندارىندا قاتتى وتىندى اكەتۋگە دايىن 50-گە جۋىق اۆتوكولىك تۇر. بيىل وسىنداي فاكتىلەردى بولدىرماۋ ءۇشىن كومىردى اۆتوكولىكپەن اكەتۋگە تىيىم سالاتىن بۇيرىق ازىرلەدىك. ءبىراق تەمىرجول كولىگىندە ەش شەكتەۋ جوق. ءبىز شەكارالاس وڭىرلەرمەن كەڭەس وتكىزدىك»، - دەپ ناقتىلادى سپيكەر.
بۇعان دەيىن ءىلياس وسپانوۆ قازاقستاندا جىلىتۋ ماۋسىمىنا دايىندىق قالاي ءجۇرىپ جاتقانىن ايتقان ەدى.
سونىمەن بىرگە قازاقستاندا كومىر قىمباتتاۋى مۇمكىن.