«درۋجبا» مۇناي قۇبىرى قاراستىرىلۋدا.
«قازمۇنايگاز» ۇك اق قازاقستاننان گەرمانياعا مۇناي جەتكىزۋ ءۇشىن قانداي باعىتتار قاراستىرىلىپ جاتقانىن ايتتى، دەپ حابارلايدى Almaty-akshamy.kz.
21 جەلتوقساندا قازمۇنايگاز 2023 جىلدىڭ قاڭتارىندا گەرمانياعا مۇناي جونەلتۋ مۇمكىندىگىن قاراستىرىپ جاتقانى جاريالانعان ەدى.
«قازاقستاننان گەرمانياعا مۇناي جەتكىزۋ ءۇشىن اتىراۋ-سامارا باعىتى جانە ودان ءارى «درۋجبا» مۇناي قۇبىرى قاراستىرىلۋدا. ناقتى كولەمدەرى ءالى انىقتالعان جوق جانە ول قازاقستاندىق جۇك جونەلتۋشىلەر ءۇشىن مۇناي جەتكىزۋدىڭ قولدانىستاعى باعىتتارىمەن سالىستىرعاندا وسى باعىتتىڭ تيىمدىلىگىنە بايلانىستى بولادى»، - دەپ جاۋاپ بەردى ۇلتتىق كومپانيا اگەنتتىك ساۋالىنا.
كومپانيانىڭ حابارلاۋىنشا، "ترانسنەفت" جۇيەسىمەن مۇنايدى ەكسپورتقا تاسىمالداۋ قازاقستاندىق تاراپتىڭ وتىنىمىمەن جۇرگىزىلۋدە. قازىرگى ۋاقىتتا رەسەي تاراپى گەرمانيا باعىتىندا «درۋجبا» مۇناي قۇبىرى ارقىلى قازاقستاندىق مۇناي جەتكىزۋگە كەلىسۋ ماسەلەسىن پىسىقتاپ جاتىر. ءتيىستى ءوتىنىمدى قازاقستاندىق تاراپ جىبەرگەن.
2021 جىلى اتىراۋ-سامارا ارقىلى 12،2 ملن توننا مۇناي، ونىڭ ىشىندە 1 ملن توننا پاۆلودار مۇناي-حيميا زاۋىتىنىڭ ءونىمى ءتۇيمازى-ومبى-نوۆوسىبىر-2 مۇناي قۇبىرى ارقىلى تاسىمالدانعان.
ال 2022 جىلدىڭ قورىتىندىسى بويىنشا تاسىمالداۋ كولەمى 10،4 ملن تونناعا دەيىن تومەندەيدى دەپ كۇتىلۋدە، ءبىراق بۇرىنعى تاسىمالداۋ كولەمى پاۆلودارداعى زاۋىتتا 1 ملن تونناعا دەيىن ساقتالادى.