قاراجاتتىڭ باسىم بولىگى وزبەكستانعا كەتكەن
ەلىمىزدەن ءبىر ايدا 92،6 ملرد تەڭگە اۋدارىلعان، دەپ حابارلايدى Almaty-akshamy.kz LS-كە سىلتەمە جاساپ.
ۇلتتىق بانكتىڭ مالىمەتىنشە، ەلىمىزدە وتكەن ايدا 226،7 مىڭ ترانزاكسيا جاسالعان. قازاقستاننان سىرتقا اۋدارىلعان قاراجاتتىڭ جالپى مولشەرى 92،6 ملرد تەڭگە، بۇل 2020 جىلدىڭ قازان ايىمەن سالىستىرعاندا +11،4%-عا جوعارى.
ەلىمىزدەن اۋدارىلعان قاراجاتتىڭ باسىم بولىگى وزبەكستانعا كەتكەن - 30،5 ملرد تەڭگە (+98%)، تۇركياعا - 20،8 ملرد تەڭگە (+28،4%). ودان كەيىن رەسەي تۇر، بۇل ەلگە 13 ملرد تەڭگە جىبەرىلگەن، قىرعىزستانعا – 11 ملرد، گرۋزياعا – 3،8 ملرد تەڭگە اۋدارىلعان.
سونداي-اق، كورشى جۇڭگو ەلىنە 3،6 ملرد تەڭگە، ارمەنياعا – 2،9 ملرد، تاجىكستانعا – 2،1 ملرد تەڭگە كەتكەن. ەڭ از مولشەردەگى قاراجات ۋكرايناعا اۋدارىلىپتى - 779،2 ملن تەڭگە.
دەگەنمەن قازان ايىندا شەتەلدەن ەلىمىزگە اۋدارىلاتىن قاراجاتتىڭ مولشەرى ازايعان. بار بولعانى 81،2 مىڭ ترانزاكسيا جاسالىپ، 23،2 ملرد تەڭگە جىبەرىلگەن (-13،7%).
قازاقستانعا اۋدارىلعان قاراجاتتىڭ نەگىزگى بولىگى وزبەكستاننان كەلگەن – 5 ملرد تەڭگە (-6%)، رەسەيدەن – 3،2 ملرد (-45،7%)، اقش – 2،9 ملرد (+15،6%)، قىرعىزستاننان – 2،9 ملرد تەڭگە (+8%). ەڭ از مولشەردەگى قاراجات ۋكراينادان – 291 ملن تەڭگە، ءباا – 278،3 ملن تەڭگە اۋدارىلعان.
ال، قازاقستان ىشىندە 63،4 مىڭ ترانزاكسيا جاسالىپ، 6،7 ملرد تەڭگە اۋدارىلعان.