2025 جىلى 3 ماۋسىمدا قازاقستانعا جاڭا كەرقۇلاندار توبى اكەلىندى. بۇل — “جابايى جىلقىلاردىڭ ورالۋى” جوباسى اياسىنداعى ەكىنشى حالىقارالىق تاسىمال.
جاڭا كەرقۇلاندار توبى پراگا زووپاركى مەن ماجار Hortobágy ۇلتتىق پاركىنەن اكەلىندى. 2 ماۋسىم كۇنى جەتى جىلقى تيەلگەن ەكى اسكەري ۇشاق چەحيا مەن ماجارستان ەلدەرىنەن ۇشىپ شىقتى. جانۋارلار ءبىر تاۋلىكتەي الىس جول اسىردى، دەپ حابارلايدى aqshamnews.kz.
3 ماۋسىم كۇنى تاڭ اتا ەكى ۇشاق ارقالىق اۋەجايىنا كەلىپ قونىپ، جانۋارلار «التىن دالا» مەملەكەتتىك تابيعي رەزەرۆاتىنىڭ اۋماعىنداعى جابايى تۇياقتىلاردى رەينترودۋكسيالاۋ ورتالىعىنا تاعى 5 ساعات جول ءجۇردى. ولار وسىنداعى كەڭ قاشالاردا ءبىر جىل ۇستالادى دا، كەيىن جابايى تابيعاتقا جىبەرىلەدى. ورتالىقتا جىلقىلاردى جايعاستىراتىن قاجەتتى ينفراقۇرىلىم مەن كۇتىپ قارايتىن ماماندار بار.
«قازاقستانداعى ءبيوارالۋاندىقتى ساقتاۋ جۇمىسىنىڭ جەتەكشى ورگانى رەتىندە تابيعاتىمىزدى قالپىنا كەلتىرۋدەگى وسىنداي ماڭىزدى كەزەڭدى باسقارۋ — ءبىز ءۇشىن اسقان قۇرمەت. ءبىر جىلدىق جۇمىستىڭ كەرەمەت ناتيجەسى — ەكىنشى توپ كەرقۇلاندار امان-ەسەن كەلىپ جەتتى، ال ءبىرىنشى توپ ابدەن كوندىگىپ، «التىن دالا» مەملەكەتتىك رەزەرۆاتىنىڭ ينسپەكتورلارىنىڭ قورعاۋىمەن جابايى تابيعات تىرشىلىگىنە تولىق دايىن»، — دەيدى قازاقستان رەسپۋبليكاسى ەكولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار الەمى كوميتەتىنىڭ ءتوراعاسى دانيار تۇرعامبايەۆ.
«وسىمەن پراگا زووپاركىنىڭ چەحيا اسكەرىمەن سەرىكتەستىكتە كەرقۇلانداردى ورتالىق ەۋروپادان قازاقستانعا ەكىنشى رەت تاسىمالداۋى. ەۋروپالىق زووپاركىلەر مەن اسىل تۇقىمدىلاردى وسىرەتىن ورتالىقتاردان كەلگەن بۇل جىلقىلار جابايى تابيعاتتا جەرگىلىكتى پوپۋلياسيا قۇرۋعا نەگىز بولادى. تىرشىلىككە بەيىمدى ءارى گەنەتيكالىق الۋان ءتۇرلى پوپۋلياسيا قالىپتاسپايىنشا، الداعى جىلدارى وسى كۇردەلى جوبانى جالعاستىرۋعا بارىنشا تىرىسامىز»، — دەيدى پراگا زووپاركىنىڭ ديرەكتورى ميروسلاۆ بوبەك.