قازاقستانعا كەمە جاسايتىن زاۋىت كەرەك پە؟

2027 جىلى پارومداردىڭ سانىن تورتەۋگە جەتكىزۋ جوسپارلانىپ وتىر.

سمايىلوۆ تەزىرەك كەمە زاۋىتىن سالاتىن ينۆەستور تابۋدى تاپسىردى، دەپ حابارلايدى Almaty-akshamy.kz

ونىڭ ايتۋىنشا، ەلدەگى تەڭىز پورتتارىنىڭ الەۋەتى وتە جوعارى. ولار ارقىلى قازىرگىدەن 3 ەسە كوپ جۇكتى اۋىستىرىپ-تيەۋگە بولادى.

"سوندىقتان ەلدەگى ينفراقۇرىلىمنىڭ مۇمكىندىكتەرىن بارىنشا ءتيىمدى پايدالانۋ ءۇشىن تالاپقا ساي كەلمەيتىن جەرلەردىڭ ءبارىن رەتكە كەلتىرۋ قاجەت. اتاپ ايتقاندا، كەمەلەردىڭ، اسىرەسە پاروم تاپشىلىعىن شەشۋگە ءتيىسپىز. ول ءۇشىن شەتەلگە تاپسىرىس بەرۋگە ءماجبۇرمىز"، - دەيدى سمايىلوۆ ۇكىمەت وتىرىسىندا.

ول العاشقى پارومداردىڭ قۇرىلىسى الداعى جىلى باستالاتىنىن اتاپ ءوتتى. 2027 جىلى ولاردىڭ سانىن 4-ۋگە جەتكىزۋ جوسپارلانىپ وتىر.

"وكىنىشكە قاراي، قازاقستاندا كەمە جاسايتىن زاۋىت جوق. ونى سالۋ ماسەلەسىن تەزدەتىپ قاراپ، ينۆەستور تارتۋ ءۇشىن شەشىم قابىلداۋ قاجەت"، - دەدى سمايىلوۆ.

سونداي-اق پرەمەردىڭ ايتۋىنشا، تەمىرجول توراپتارى مەن پورتتارعا دەيىنگى كىرمە جولداردى كەڭەيتۋ ماسەلەسى دە وزەكتى بولىپ وتىر. جۇكتەردى راسىمدەۋگە قاتىستى سۇراقتار بار.

كولىك مينيسترلىگىنىڭ اقپاراتىنشا، ءقازىر اقتاۋ جانە قۇرىق پورتتارىنىڭ وتكىزۋ قۋاتى 21 ملن توننانى قۇرايدى.