قازاقستانعا كەلىپ جاتقان رەسەيلىكتەردىڭ سانى ازايدى

ەلىمىزگە 200 مىڭنان استام رەسەيلىك كەلگەن.

ق ر پرەمەر-مينيسترىنىڭ ورىنباسارى-سىرتقى ىستەر ءمينيسترى مۇحتار تىلەۋبەردى قازاقستانعا كەلىپ جاتقان رەسەيلىكتەرگە قاتىستى پىكىر ءبىلدىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ق ر ىشكى ىستەر مينيسترلىگىنىڭ مالىمەتىنە قاراعاندا، 21 قىركۇيەكتەن بەرى ەلىمىزگە 200 مىڭنان استام رەسەيلىك كەلگەن.

«سوڭعى مالىمەتتەر بويىنشا، كەشە قازاقستانعا قاراي اعىلعان ءنوپىر باسەڭسىدى. ياعني قازاقستاننان كەتكەن رەسەيلىكتەردىڭ سانى ەلىمىزگە كەلگەندەرگە قاراعاندا ارتىق بولعان»، - دەدى م. تىلەۋبەردى ماجىلىستە تىلشىلەر ساۋالىنا جاۋاپ بەرە وتىرىپ.

بۇدان بۇرىن حابارلانعانداي، 4 قازان كۇنى ق ر ىشكى ىستەر ءمينيسترى مارات احمەتجانوۆ ۇكىمەت وتىرىسىنان كەيىن ب ا ق وكىلدەرىنە بەرگەن سۇحباتىندا قازاقستاندى پانالاپ جاتقان رەسەيلىكتەر تۋرالى سوڭعى ستاتيستيكانى جاريالادى.

«بۇل ماسەلە باقىلاۋدا. رەسەيدىڭ 200 مىڭنان استام ازاماتى كىردى. ءبىراق بۇگىنگى تاڭدا 147 مىڭى شىعىپ كەتتى. ارينە، ءىشىنارا موبيليزاسيا جاريالانعان كەزدەردە ۇلكەن كەپتەلىستەر بولدى. كەشەدەن باستاپ بۇرىنعى قالپىنا كەلىپ وتىر. مىسالى، كەشەگى كۇندى الاتىن بولساق، رەسەيدىڭ 7 مىڭنان استام ازاماتى مەملەكەتىمىزگە كىردى، 11 مىڭعا جۋىعى شىعىپ كەتتى. سوندىقتان ءقازىر كەلگەندەر شىعىپ جاتىر. ميگراسيالىق احۋال باقىلاۋدا. جان-جاقتى قاراپ جاتىرمىز»، - دەدى م. احمەتجانوۆ.