ەندى قازاقستانعا العاش رەت اكەلىنەتىن بارلىق ءموبيلدى قۇرىلعىلار GSMA حالىقارالىق دەرەكتەر بازاسىندا تەكسەرۋدەن ءوتۋى ءتيىس، دەپ حابارلايدى aqshamnews.kz.
بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ باسپا ءسوز قىزمەتى حابارلادى. سونداي-اق، مەملەكەتتىك سالىق جانە كەدەن جۇيەلەرىنىڭ دە سۇزگىسىنەن وتكىزىلەدى. ياعني، تەلەفونداردا ارنايى سيپاتتامالار، زاڭدى جانە ىلەسپە قۇجاتتارىنىڭ بولۋى ماڭىزدى. IMEI كودتارى دا زەرتتەلەدى. بىلايشا ايتقاندا، ۇرلانعان، جوعالعان نەمەسە بۇعاتتالعان گادجەت جۇمىس ىستەمەيدى.
تەكسەرۋ ءراسىمى يمپورتتاۋشىلار، جەكە تۇلعالار جانە ۋاكىلەتتى سەرۆيستىك ورتالىقتار ءۇشىن مىندەتتى بولىپ تابىلادى. ەرەجە 25 ناۋرىزدا كۇشىنە ەندى. بۇرىن ەلدىڭ ءموبيلدى جەلىلەرىندە تىركەلگەن بارلىق تەلەفوندار اۆتوماتتى تۇردە «اق تىزىمگە» ەنگىزىلدى. ەندى ول شەكتەۋسىز جۇمىسىن جالعاستىرا بەرەدى. ال تىركەلمەگەن گادجەت يەلەرى 25 مامىرعا دەيىن تەكسەرۋدەن وتپەسە، بىردەن بۇعاتتالادى.