الماتىدا قازاقستاندا اەس سالۋ ماسەلەسى بويىنشا جاريا تالقىلاۋلار باستالدى. بۇل تالقىلاۋلارعا اتوم سالاسىنىڭ سالالىق ساراپشىلارى، مەملەكەتتىك ورگانداردىڭ وكىلدەرى، جۇرتشىلىق پەن ازاماتتىق سەكتور وكىلدەرى قاتىسۋدا. بۇل اتوم ەلەكتر ستانسياسىنىڭ قۇرىلىسى پەرسپەكتيۆاسىن تالقىلايتىن ون توعىزىنشى تىڭداۋ، دەپ حابارلايدى aqshamnews.kz
ءىس-شارانىڭ مودەراتورلارى: قالالىق قوعامدىق كەڭەستىڭ مۇشەسى بوريس جاپاروۆ، قازاقستان ازاماتتىق اليانسىنىڭ پرەزيدەنتى بانۋ نۇرعازييەۆا جانە الماتى ازاماتتىق اليانسىنىڭ ءتوراعاسى قايىرجان ءابدىحالىقوۆ.
«مەن وتكەن جىلى ۇلكەن اۋىلىندا بولعانىمدا، العاشقى جاريا تالقىلاۋلاردىڭ ءوتىپ، جەرگىلىكتى حالىقتىڭ پىكىرىن تىڭداعان ەدىم. جەرگىلىكتى تۇرعىندار كوپ جىلدان بەرى وزگەرىستەر مەن اەس قۇرىلىسىن كۇتىپ وتىر. اتوم ەنەرگەتيكاسى تۋرالى ايتساق، بۇل قازىرگى تاڭدا ەڭ دامىعان مەملەكەتتەر قولداناتىن جاسىل تەحنولوگيالار»، ― دەدى بانۋ نۇرعازييەۆا جاريا تالقىلاۋدى اشا وتىرىپ.
جاريا تالقىلاۋلار بارىسىندا ازاماتتار وزدەرىن قىزىقتىراتىن كەز كەلگەن سۇراقتارىن، تەحنولوگيالاردىڭ قاۋىپسىزدىگى مەن اەس قۇرىلىسىنىڭ الەۋمەتتىك-ەكونوميكالىق اسپەكتىلەرى بويىنشا قويا الادى.
2023 جىلعى 1 قىركۇيەكتە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ «ءادىل قازاقستاننىڭ ەكونوميكالىق باعىتى» اتتى قازاقستان حالقىنا جولداۋىن جاريالادى. مەملەكەت باسشىسى ءوز جولداۋىندا اتوم ەنەرگەتيكاسىن دامىتۋدىڭ اسا ماڭىزدى ەكونوميكالىق جانە ساياسي اسپەكت ەكەنىن اتاپ ءوتتى. وسى سەبەپتى ول بۇل ماسەلەنى جالپىۇلتتىق رەفەرەندۋم ارقىلى شەشۋدى ۇسىندى.
2024 جىلدىڭ ماۋسىم ايىنىڭ سوڭىندا پرەزيدەنت توقايەۆ اتوم ەلەكتر ستانسياسىن سالۋ بويىنشا رەفەرەندۋم اعىمداعى جىلدىڭ كۇزىندە وتەتىنىن مالىمدەدى. تاريحي كۇندى قازاقستان ۇكىمەتى انىقتايتىن بولادى.