25 ماۋسىمدا ەتنيكالىق قازاق بالالارىنا ارنالعان «Jas Qazaq» جازعى-ەتنو لاگەرىنىڭ اشىلۋى ءوتتى
سىرتقى ىستەر مينيسترلىگىنە قاراستى «وتانداستار قورى» كەاق ۇيىمداستىرۋىمەن جانە IQanat قورىنىڭ قولداۋىمەن شەتەلدە تۇراتىن ەتنيكالىق قازاق بالالارىنا ارنالعان جازعى ەتنو-لاگەر جۇمىسىن باستادى، دەپ حابارلايدى Almaty-akshamy.kz.
وتانداستار قورىنىڭ «Jas Qazaq» جازعى ەتنو-لاگەرى ءتورتىنشى رەت ۇيىمداستىرىلىپ جاتىر. وسىعان دەيىن 400-دەن اسا قانداس بالالار قاتىسسا، بيىل رەسەي، موڭعوليا، وزبەكستان، قىرعىزستان، جۇڭگو، وڭتۇستىك كورەيا جانە يران ەلدەرىنەن 255 ەتنيكالىق قازاق بالالارى تاريحي وتانىنا كەلدى. قاتىسۋشىلاردىڭ اراسىندا توتەنشە جاعداي كەزىندە قازاقستاندىق دوستارىنا جىلۋ جيناعان موڭعوليالىق قازاق بالالارى، ءتۇرلى بايقاۋلارعا قاتىسىپ، بىلىمدەرى مەن بىلىكتىلىكتەرىن دالەلدەگەن قاراكوز قانداستارىمىز بار.
25 ماۋسىم كۇنى لاگەردىڭ رەسمي اشىلۋ سالتاناتىنا ق ر پارلامەنتى ءماجىلىسىنىڭ دەپۋتاتتارى بولات كەرىمبەك جانە نۇرگۇل تاۋ، روسسوترۋدنيچەستۆونىڭ استاناداعى وكىلدىك باسشىسى ولگا فيلونوۆا، «وتانداستار قورى» كەاق پرەزيدەنتى دانيار قادىروۆ جانە IQanat مەكتەبىنىڭ ديرەكتورى زايكەن جانات قاتىسىپ، بالالارعا اقجارما تىلەكتەرىن ءبىلدىردى.
لاگەر 2024 جىلعى 24 ماۋسىم جانە 7 شىلدە ارالىعىندا بۋرابايداعى «IQanat High School of Burabay» مەكتەبى بازاسىندا وتەدى. بالالار ەكى اپتادا قازاق ءتىلى، تاريحى مەن ءسالت-داستۇرىن ۇيرەنىپ، ۇلتتىق ويىندار مەن مۋزىكالىق اسپاپتاردا وينايدى، اتقا ءمىنىپ، كيىز ءۇي قۇرادى، ەلىمىزدەگى جوعارى وقۋ ورىندارىنىڭ قاتىسۋىمەن وتەتىن ءبىلىم كورمەسىنە قاتىسادى جانە ەڭ باستىسى الەمنىڭ كوپتەگەن ەلىنەن دوستار تابادى.