اكادەميك ن. ج. باتپەنوۆ اتىنداعى ۇلتتىق تراۆماتولوگيا جانە ورتوپەديا عىلىمي ورتالىعى ميكروحيرۋرگيالىق جۇيەلەردەن باستاپ روبوتتى كەشەندەرگە دەيىنگى مەديسينالىق قۇرالدار كەشەنىن ەنگىزە وتىرىپ، مەديسينالىق كومەك كورسەتۋدىڭ جاڭا دەڭگەيىنە شىقتى.
جاڭا جابدىق وپەراسيالاردى جوعارى دالدىكپەن جانە از ينۆازيۆتىلىكپەن جۇرگىزۋگە، پاسيەنتتەردى وڭالتۋ ۋاقىتىن قىسقارتۋعا جانە اسقىنۋ ءقاۋپىن ازايتۋعا مۇمكىندىك بەرەدى، دەپ حابارلايدى aqshamnews.kz.
ورتالىقتى جاڭعىرتۋ «سامۇرىق-قازىنا» اق قولداۋىنىڭ ارقاسىندا مۇمكىن بولدى، ول جابدىقتاردى ساتىپ الۋعا شامامەن 400 ملن تەڭگە ءبولدى. نەگىزگى جاڭالىقتاردىڭ ءبىرى قازاقستاندا العاش رەت قولدانىلاتىن Mast Quadrant حيرۋرگيالىق رەتراكتورى بولدى. بۇل ومىرتقاعا جوعارى دالدىكپەن وپەراسيا جاساۋعا مۇمكىندىك بەرەدى، جۇمساق تىندەردىڭ جاراقاتتارىن ازايتادى جانە پاسيەنتتەردىڭ تەز قالپىنا كەلۋىن قامتاماسىز ەتەدى.
«سامۇرىق-قازىنا» سياقتى ارىپتەستەردىڭ قولداۋىنىڭ ارقاسىندا قازاقستان مەديسينادا جاڭا تەحنولوگيالاردى بەلسەندى ەنگىزۋدى جالعاستىرىپ، ولاردى تەك ەلوردالىق قانا ەمەس، وڭىرلىك مەديسينالىق ورتالىقتار ءۇشىن دە قولجەتىمدى ەتەدى»، - دەدى دەنساۋلىق ساقتاۋ ۆيسە-مينيسترى ەرجان نۇرلىبايەۆ.
بۇل جۇيەلەردى ەنگىزۋ - تەحنولوگيالىق سەرپىلىس قانا ەمەس، مىڭداعان قازاقستاندىقتاردىڭ ءومىر ءسۇرۋ ساپاسىن جاقسارتۋعا جاسالعان قادام.
«بۇل - ۇلت دەنساۋلىعىنا سالىنعان ينۆەستيسيا. جاڭا جابدىق، اسىرەسە تىرەك-قيمىل اپپاراتى اۋرۋلارى بار پاسيەنتتەر ءۇشىن مەديسينالىق كومەكتىڭ دەڭگەيىن ەداۋىر ارتتىرۋعا مۇمكىندىك بەرەدى»، - دەپ اتاپ ءوتتى قوردىڭ باسشىسى نۇرلان جاقىپوۆ.
كورپوراتيۆتىك الەۋمەتتىك جاۋاپكەرشىلىك شەڭبەرىندە قور سونىمەن قاتار، ۇلتتىق شۇعىل مەديسينانى ۇيلەستىرۋ ورتالىعى مەن ەل وڭىرلەرىندەگى وڭالتۋ ورتالىقتارىنىڭ جەلىسى سياقتى مەديسينالىق مەكەمەلەردى جاڭعىرتۋدى قولدايتىنىن ايتا كەتكەن ءجون.