مۇنداي كومەكتى 600 مىڭنان استام قازاقستاندىق العان.
قازاقستان ۇكىمەتى جىل باسىنان بەرى مۇگەدەكتىك جانە اسىراۋشىسىنان ايىرىلۋ جاعدايى بويىنشا جاردەماقى تۇرىندە مەملەكەت ازاماتتارىنا 34،6 ملرد تەڭگەدەن استام قاراجات تولەگەن، دەپ حابارلايدى Almaty-akshamy.kz.
مامانداردىڭ ايتۋىنشا، 2022 جىلعى قاڭتار ايىندا رەسپۋبليكالىق بيۋدجەتتەن مۇگەدەكتىك بويىنشا مەملەكەتتىك الەۋمەتتىك جاردەماقى تولەۋگە 27،2 ملرد تەڭگە، اسىراۋشىسىنان ايىرىلۋ جاعدايىنا بايلانىستى 7،4 ملرد تەڭگە باعىتتالدى.
2022 جىلعى 1 اقپانداعى جاعداي بويىنشا، مۇگەدەكتىگىنە بايلانىستى مەملەكەتتىك الەۋمەتتىك جاردەماقى الۋشىلاردىڭ سانى 523 مىڭ ادامدى، اسىراۋشىسىنان ايىرىلۋ جاعدايى بويىنشا 170،4 مىڭ ادامدى قۇرايدى.
«مۇگەدەكتىك جانە اسىراۋشىسىنان ايىرىلۋ جاعدايى بويىنشا مەملەكەتتىك الەۋمەتتىك جاردەماقىلاردىڭ مولشەرى مۇگەدەكتىك توبىنا جانە سەبەبىنە، قايتىس بولعان (قازا تاپقان) اسىراۋشىنىڭ اسىراۋىنداعى ادامدار سانىنا، سونداي-اق ءتيىستى قارجى جىلىنا ارنالعان «رەسپۋبليكالىق بيۋدجەت تۋرالى» زاڭىندا بەلگىلەنەتىن ەڭ تومەن كۇنكورىس دەڭگەيىنىڭ شاماسىنا بايلانىستى بولادى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
2022 جىلعى 1 اقپانداعى جاعداي بويىنشا، مۇگەدەكتىك جونىندەگى مەملەكەتتىك الەۋمەتتىك جاردەماقىنىڭ ورتاشا مولشەرى 52 018 تەڭگەنى، اسىراۋشىدان ايىرىلۋ جاعدايىندا 43 528 تەڭگەنى قۇرادى.