ۇكىمەت ارنايى باعدارلاما ازىرلەيدى.
قازاقستان ۇكىمەتى مەملەكەت ازاماتتارىنىڭ تابىسىن ارتتىرۋ بويىنشا ارنايى باعدارلامىنى جۇزەگە اسىرۋدى كوزدەپ وتىر. بۇل تۋرالى ەڭبەك جانە حالىقتى الەۋمەتتىك قورعاۋ ۆيسە-مينيسترى ەرجان ءبىرجانوۆ قازاقستان پرەزيدەنتى جانىنداعى ورتالىق كوممۋنيكاسيالار قىزمەتىندە وتكەن بريفينگتە ايتىپ بەردى، دەپ حابارلايدى Almaty-akshamy.kz.
«ەڭبەكمينى حالىقتىڭ تابىسىن 2025 جىلعا دەيىن ارتتىرۋ جونىندەگى باعدارلاما شەڭبەرىندە جاڭا جۇمىس ورىندارىن قۇرۋ، حالىقتى جۇمىسپەن قامتۋعا جاردەمدەسۋ، ەڭبەك رەسۋرستارىنىڭ داعدىلارىن جەتىلدىرۋ جانە جاستاردى كاسىپتىك باعدارلاۋ جۇمىسىن جۇرگىزەدى. باعدارلامانىڭ 38 ءىس-شاراسى ەڭبەكمينىنىڭ قاتىسۋىمەن ىسكە اسىرىلاتىن بولادى، ونىڭ 17ء-ىن مينيسترلىك تىكەلەي جۇزەگە اسىراتىن بولادى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
ۆيسە-مينيستر حالىقتىڭ تابىسىن ارتتىرۋ جونىندەگى باعدارلامادا كوزدەلگەن ءاربىر باعىت بويىنشا جۇرگىزىلىپ جاتقان جانە جوسپارلانىپ وتىرعان جۇمىس تۋرالى ەگجەي-تەگجەيلى ايتىپ بەردى.
ءبىرىنشى. جاڭا جۇمىس ورىندارىن قۇرۋ.
فريلانسەرلەر قىزمەتىن سيفرلىق فورماتقا كوشىرۋ ماقساتىندا ەڭبەكمينى «پلاتفورمالىق جۇمىسپەن قامتۋ» ەلەكتروندىق سەرۆيسىن ازىرلەيتىن بولادى. بۇل ءوزىن-وزى جۇمىسپەن قامتىعان ازاماتتاردىڭ قىزمەتىن ءتۇرلى پلاتفورمالاردا وڭاي تىركەۋگە، قاجەتتى مامانداردى تەز تابۋعا، ەڭبەك قۇقىقتارىن قورعاۋعا جانە تاپسىرىس بەرۋشىلەرمەن قارىم-قاتىناستى رەسمي رەسىمدەۋگە مۇمكىندىك بەرەدى.
مەملەكەت باسشىسىنىڭ تاپسىرماسى بويىنشا شەتەلدىك جۇمىس كۇشىن تارتۋعا كۆوتا 3 جانە 4 سانات بويىنشا 4،7 مىڭ ادامعا قىسقارتىلدى.
بۇل شارالار حالىقتىڭ جۇمىسپەن قامتىلۋ دەڭگەيىن ارتتىرۋعا جانە ىشكى ەڭبەك نارىعىن قورعاۋعا مۇمكىندىك بەرەدى.
ەكىنشى. حالىقتى جۇمىسپەن قامتۋعا جاردەمدەسۋ.
ەڭبەك نارىعىندا ارنايى تاسىلدەردى تالاپ ەتەتىن بىرنەشە توپتى اتاپ وتۋگە بولادى (جۇمىسسىز جاستار جانە NEET ساناتىنداعى جاستار، كوپبالالى جانە تابىسى از وتباسىلار، سونداي-اق مۇگەدەكتىگى بار بالالاردى تاربيەلەپ وتىرعان وتباسىلار).
وسىعان بايلانىستى مەملەكەتتىك جانە جەكە دەرەكقورلاردى ينتەگراسيالاۋ جانە ولاردان الىنعان اقپاراتتى تالداۋ ارقىلى الەۋمەتتىك قولداۋ مەن جۇمىسپەن قامتۋعا مۇقتاج ازاماتتاردى «ەرتە انىقتاۋ جۇيەسىن» ەنگىزۋ جوسپارلانۋدا.