ءماجىلىس زاڭ جوباسىن ماقۇلدادى.
جەكە تۇلعالاردىڭ پروبلەمالىق ميكروكرەديتتەرىن كەشىرگەن ميكروقارجى ۇيىمدارىنىڭ كىرىستەرىنە ءۇش جىل بويى سالىق سالىنبايدى، دەپ حابارلايدى Almaty-akshamy.kz
نەگىزگى زاڭ جوباسى اياسىندا بالالارعا ۇلتتىق قوردىڭ تابىسىنان اۋدارىلاتىن نىسانالى جيناقتاردى سالىقتان بوساتۋ ۇسىنىلعان. پارلامەنت ءماجىلىسى ءتيىستى تۇزەتۋ كوزدەلگەن زاڭ جوباسىن ءبىرىنشى وقىلىمدا ماقۇلدادى.
ماجىلىستە دەپۋتاتتاردىڭ باستاماسىمەن ازىرلەنگەن Cالىق كودەكسىنە وزگەرىستەر مەن تولىقتىرۋلار ەنگىزۋ جونىندەگى جانە وعان ىلەسپە سالىق سالۋ ماسەلەلەرى بويىنشا زاڭ جوبالارى قارالدى.
ماجىلىسمەن ءمادي تاكييەۆتىڭ ايتۋىنشا، زاڭ جوبالارىنىڭ نەگىزگى نورمالارى پرەزيدەنتتىڭ كەيبىر تاپسىرمالارىن جانە كونستيتۋسيالىق سوتتىڭ شەشىمدەرىن جۇزەگە اسىرۋدى زاڭنامالىق تۇرعىدا قامتاماسىز ەتۋگە باعىتتالعان.
"بۇگىنگى كۇنى بارشامىزدى تولعاندىرىپ جۇرگەن وزەكتى ماسەلەلەردىڭ ءبىرى حالىقتىڭ شامادان تىس كرەديت الۋىن ازايتۋ ءۇشىن جەكە تۇلعالاردىڭ بەرەشەگى ميكروقارجىلىق ۇيىمدارمەن، كوللەكتورلىق اگەنتتىكتەرمەن كەشىرىلگەن كەزدە قالىپتاساتىن كىرىستەردى سالىق سالۋدان بوساتۋ كوزدەلىپ وتىر. جەكە تۇلعالاردىڭ پروبلەمالىق ميكروكرەديتتەرى ەسەپتەن شىعارىلۋىنا بايلانىستى ميكروقارجى ۇيىمدارىنىڭ كىرىستەرىن سالىق سالۋدان ۋاقىتشا، ياعني ءۇش جىلعا بوساتۋ قاراستىرىلعان"، - دەدى تاكييەۆ تومەنگى پالاتانىڭ وتىرىسىندا.
نەگىزگى زاڭ جوباسى اياسىندا بالالارعا ۇلتتىق قوردىڭ تابىسىنان اۋدارىلاتىن نىسانالى جيناقتاردى سالىقتان بوساتۋ ۇسىنىلعان.
سونداي-اق ەلىمىزدىڭ ازاماتتارى مەن زاڭدى تۇلعالارى سوتقا جۇگىنگەندە ايقىندالعان مەملەكەتتىك باجدى تولەۋگە مۇمكىندىگى بولماعان جاعدايدا، كونستيتۋسيالىق قۇقىعىن تولىق پايدالانۋىن قامتاماسىز ەتۋ ءۇشىن وسى تولەمدى كەيىنگە قالدىرۋ تەتىكتەرى كوزدەلىپ وتىر.
ەكىنشى دەڭگەيلى بانكتەردىڭ ۇلتتىق بانك نوتالارى بويىنشا سالىق سالىناتىن كىرىسىن ازايتۋعا مۇمكىندىك بەرەتىن قۇقىعىن الىپ تاستاۋ جوسپارلانۋدا.
"مۇنداي قادام ولاردى بوس قاراجاتتارى ەسەبىنەن ەكونوميكانىڭ ناقتى سەكتورىن، سونىڭ ىشىندە بيزنەستى كرەديتتەۋگە باعىتتايدى دەگەن سەنىممەن جاسالىپ وتىر"، - دەيدى ماجىلىسمەن.
بۇعان قوسا بارلىق ارنايى ەكونوميكالىق ايماقتىڭ تيىمدىلىگىن ارتتىرۋ ماقساتىندا ولاردىڭ قاتىسۋشىلارىنا سالىقتىق جەڭىلدىكتەر بەرۋدىڭ سارالانعان ءتاسىلىن ەنگىزۋ ۇسىنىلادى.
ودان بولەك، ەاەو اياسىندا الكوگول جانە تەمەكى ونىمدەرىنە اكسيزدەردىڭ ستاۆكالارىن كەزەڭ-كەزەڭىمەن ارتتىرۋ جۇمىسى اياسىندا سىرا قايناتۋ ونىمدەرىنە اكسيز ستاۆكالارىن ليترىنە 79 تەڭگەدەن 90 تەڭگەگە دەيىن كوتەرۋ جوسپارلانىپ وتىر.
سونىمەن قاتار، سالىقتىق اكىمشىلەندىرۋگە قاتىستى قولدانىستاعى سالىق كودەكسىنىڭ كەيبىر نورمالارى ناقتىلاندى. ونىڭ ىشىندە جەكە تۇلعالاردىڭ كىرىستەرى مەن مۇلىكتەرىن جالپىعا بىردەي دەكلاراسيالاۋ ناۋقانىنىڭ العاشقى ەكى كەزەڭىنىڭ ءوتۋ ناتيجەلەرىن ەسكەرە وتىرىپ، الداعى دەكلاراسيالاۋ ۇردىسىنە ءبىراز جەڭىلدىكتەر ەنگىزىلەدى.
ءماجىلىس دەپۋتاتتارى زاڭ جوبالارىن ءبىرىنشى وقىلىمدا ماقۇلدادى.