بۇل جامان ناتيجە ەمەس.
ماماندار قازاقستاندىقتاردىڭ قارجىلاي ساۋاتى كوتەرىلىپ كەلە جاتقانىن ايتادى، دەپ حابارلايدى Almaty-akshamy.kz Inbusiness.kz cىلتەمە جاساپ.
بيىل قارجىلىق مونيتورينگ اگەنتتىگى ارەكەتى كۇماندى 8،5 مىڭ ينتەرنەت رەسۋرستىڭ جۇمىسىن بۇعاتتاعان. دەگەنمەن، قازىرگى تاڭدا ءتىپتى جوعارى ءبىلىمى بار، كوز اشىق ازاماتتاردىڭ ءوزى قارجى الاياقتارىنىڭ الداۋىنا ءتۇسىپ جاتادى. وعان سەبەپ - حالىقتىڭ باسىم كوپشىلىگى قارجىلىق قاۋىپسىزدىك داعدىلارىن بىلمەيدى. بۇل تەندەنسيا قازاقستاندا عانا ەمەس ەۋروپا مەن ورتالىق ازيا ەلدەرىنە دە ءتان. بۇل تۋرالى ورتالىق كوممۋنيكاسيالىق قىزمەتىندە وتكەن "حالىقتىڭ قارجىلىق قاۋىپسىزدىگى مەن ساۋاتتىلىعىن ارتتىرۋ تۋرالى" بريفينگتە قارجى مونيتورينگى اگەنتتىگى، كادر جۇمىسى دەپارتامەنتىنىڭ ديرەكتورى نۇرلان ادالييەۆ مالىمدەدى.
ۆەدومستۆا وكىلدەرى قارجىلىق قاۋىپسىزدىك داعدىلارىن مەكتەپ قابىرعاسىنان باستاپ قالىپتاستىرۋ كەرەك ەكەنىن ايتادى. قازىرگى تاڭدا قارجىلىق قاۋىپسىزدىك بويىنشا 5-سىنىپتاردان باستاپ ءمودۋلدى ءپان رەتىندە ساباق وتىلەدى.
سونداي-اق، سپيكەر قارجىلىق الاياقتىقتىڭ ۇدەۋىنە ينتەرنەت ارقىلى ۇسىنىلاتىن قارجىلىق ونىمدەردىڭ سانى جىل سايىن ارتىپ، وعان قول جەتكىزە الاتىن ادامداردىڭ جاسارىپ بارا جاتۋى ىقپال ەتكەنىنە ەرەكشە نازار اۋداردى. ويتكەنى ەلىمىزدە بالالار 10 جاستان باستاپ-اق بانك كارتاسىن قولدانا الادى.
"قازىرگى تاڭدا قارجىلىق مونيتورينگ اگەنتتىگى "قارجى پيراميداسى" سەكىلدى الاياقتىق فورماسىن قۇرۋ مەن جەتەكشىلىك ەتۋگە قارسى ءىس-قيمىل مەحانيزمدەرىن ىسكە قوسىپ، جەتىلدىرگەن. ءقازىر ينتەرنەت ارقىلى الاياقتارعا قارجى اۋدارۋ مۇمكىندىگىن ازايتۋ ءۇشىن كۇماندى سايتتار مەن الەۋمەتتىك جەلىلەردەگى اككاۋنتتار انىقتالىپ، ولارعا تيىم سالىنىپ جاتىر. تەك وسى جىلى عانا قارجىلىق مونيتورينگ اگەنتتىگى 8،5 مىڭ وسىنداي ينتەرنەت رەسۋرستىڭ جۇمىسىنا تيىم سالدى"، - دەيدى نۇرلان ادالييەۆ.
سونىمەن قاتار، وقۋشىلار مەن ستۋدەنتتەردىڭ بويىندا قارجىلىق قاۋىپسىزدىك داعدىلارىن قالىپتاستىرۋ ءۇشىن وڭىرلەردەگى قارجىلىق مونيتورينگ دەپارتامەنتتەرى مەن ورتالىق اپپارات ماماندارى بيىلعى وقۋ جىلىندا تۇڭعىش رەت ستۋدەنتتەر مەن وقۋشىلارعا دارىستەر وتكىزدى. وندا بانك كارتالارى، ينتەرنەت ساۋدا، قارجى پيراميداسى مەن سلۋدومانيا پروبلەماسىنا قاتىستى اقپاراتتار بەرىلدى. جىل باسىنان بەرى مۇنداي ساباقتار 17 مىڭنان استام وقۋشى مەن ستۋدەنتتى قامتىدى. مۇنداي لەكسيالار 300 مەكتەپ، 34 جوو مەن 40 كوللەدجدە وقىلعان.
جالپى، قازاقستاندىقتاردىڭ قارجىلاي ساۋاتى كوتەرىلىپ كەلەدى. ەكونوميكالىق دامۋ جانە ىقپالداستىق ۇيىمىنىڭ زەرتتەۋىنشە بيىل قارجىلاي ساۋات يندەكسى 39،02%، بىلتىر ول كورسەتكىش 39،52%-دى قۇراعان ەدى.
"نەگىزى اتالعان يندەكس بويىنشا ورتاشا حالىقارالىق يندەكس 40%-دى قۇرايدى. سوندىقتان، بۇل جامان ناتيجە ەمەس"، - دەيدى نۇرلان ادالييەۆ.