قازاقستاندىقتاردىڭ وڭتۇستىك كورەيادا جۇمىس ىستەۋىنە رۇقسات بەرىلۋى مۇمكىن

وڭتۇستىك كورەيا وتانداستارىمىزعا رەسمي تۇردە جۇمىسقا ورنالاسۋعا رۇقسات بەرۋى مۇمكىن.

ءقازىر قازاقستاندى "ەڭبەككە رۇقسات بەرۋ جۇيەسىنە" ەنگىزۋ ماسەلەسى پىسىقتالىپ جاتىر. شەتەل اسىپ، جۇمىس ىستەگىسى كەلەتىن ازاماتتار الدىمەن ءتىل مەن زاڭ ۇيرەنەدى. كوشى-قون كوميتەتىنىڭ ءتوراعاسى اسقاربەك ەرتايەۆتىڭ مالىمەتى بويىنشا تىركەۋدىڭ ءبىرىنشى كەزەڭى اياقتالدى، دەپ حابارلايدى Almaty-akshamy.kz 24.kz-كە سىلتەمە جاساپ.

ايتا كەتەيىك، قازاقستان بۇعان دەيىن تۇركيا، بىرىككەن اراب امىرلىكتەرى، ۇلىبريتانيا، گەرمانيا، يزرايل جانە قاتار مەملەكەتىمەن كەلىسىمگە كەلگەن. اسقاربەك ەرتايەۆ، ق ر ەڭبەك جانە حالىقتى الەۋمەتتىك قورعاۋ مينيسترلىگى كوشى-قون كوميتەتىنىڭ ءتوراعاسى: - migration.enbek.kz سايتىنا تىركەلە وتىرىپ، وسى جۇيە ارقىلى جۇمىسقا ورنالاسۋعا بولادى. ونى ەڭبەك ۇتقىرلىعى ورتالىقتارى جۇزەگە اسىرادى. شەتەلدە جۇمىس ىستەگىسى كەلگەن ادام، الدىمەن ءتىل ۇيەرەنەدى، مەديسينالىق تەكسەرۋدەن وتەدى جانە قۇجاتتارىن رەسىمدەيدى. بۇگىنگى تاڭدا شەتەلدە 200 مىڭعا جۋىق قازاقستاندىق ەڭبەك ەتىپ ءجۇر. ولاردىڭ باسىم بولىگى رەسەيدى تاڭداعان. مۇندا 162 مىڭ وتانداسىمىز جۇمىس ىستەيدى. ال پولشادا - 13 مىڭ، ۇلىبريتانيادا – 5 مىڭ قازاقستاندىق بار.