قازاقستاندىقتار ءجيى قىزىقتىراتىن سۇراقتاردىڭ ءبىرى – ازاماتتاردىڭ مىندەتتى الەۋمەتتىك مەديسينالىق ساقتاندىرۋعا (ءمامس) تولەگەن جارنالارى مەن اۋدارىمدارى قايدا ساقتالاتىنى جانە قالاي باعىتتالاتىنى. الەۋمەتتىك مەديسينالىق ساقتاندىرۋ قورى وسى ماسەلەگە تولىق جاۋاپ بەردى.
قايدا ساقتالادى؟
بارلىق جارنالار مەن اۋدارىمدار قازاقستان رەسپۋبليكاسى ۇلتتىق بانكىنىڭ ارنايى شوتىنا تۇسەدى. سول جەردەن بۇل قاراجات حالىققا كورسەتىلگەن مەديسينالىق قىزمەتتەرگە اقى تولەۋ ءۇشىن مەديسينالىق ۇيىمدارعا جىبەرىلەدى.
زاڭنامالىق نەگىزدەر
«مىندەتتى الەۋمەتتىك مەديسينالىق ساقتاندىرۋ تۋرالى» زاڭنىڭ 21-بابىندا الەۋمەتتىك مەديسينالىق ساقتاندىرۋ قورىنىڭ ينۆەستيسيالىق قىزمەتى قوردىڭ اكتيۆتەرىن (ءمامس قاراجاتىن) قازاقستان رەسپۋبليكاسىنىڭ ۇلتتىق بانكى ارقىلى قارجى قۇرالدارىنا ورنالاستىرۋ جولىمەن جۇزەگە اسىرىلاتىنى كورسەتىلگەن. قور مەن ۇلتتىق بانك اراسىندا سەنىمگەرلىك باسقارۋ شارتى جاسالعان.
قالاي جۇزەگە اسىرىلادى؟
ۇلتتىق بانك ءمامس قاراجاتىن بەكىتىلگەن قارجى قۇرالدارىنىڭ تىزبەسىنە سايكەس قاتاڭ تۇردە باعالى قاعازدار مەن دەپوزيتتەرگە ورنالاستىرادى. بۇل جۇيە ينۆەستيسيالىق تابىس الۋعا جانە ءمامس جۇيەسىنىڭ جيناقتالعان اكتيۆتەرىنىڭ سوماسىن ۇلعايتۋعا مۇمكىندىك بەرەدى. الىنعان قاراجات تەك مەديسينالىق قىزمەتتەرگە اقى تولەۋگە باعىتتالادى جانە قوردىڭ قاجەتتىلىگىنە جۇمسالمايدى. قور ءوز ەركىمەن ءمامس قارجىسىن ورنالاستىرمايدى.
2024 جىلعى جاعداي
2024 جىلعى 1 قاڭتارداعى جاعداي بويىنشا، 2017 جىلدان بەرى جيناقتالعان ءمامس اكتيۆتەرىنىڭ قالدىعى 933 ملرد تەڭگەنى قۇرادى. 2024 جىلدىڭ ءتورت ايىندا قورعا 441 ملرد تەڭگە ءمامس جارنالارى مەن اۋدارىمدار ءتۇستى، ونىڭ ىشىندە 42 ملرد تەڭگە سوماسىنا ينۆەستيسيالىق تابىس الىندى. مەديسينالىق كومەككە اقى تولەۋگە جۇمسالعان شىعىستار 354 ملرد تەڭگەنى قۇرادى. 2024 جىلعى 1 مامىرداعى جاعداي بويىنشا قور اكتيۆتەرىنىڭ قالدىعى – 1020 ملرد تەڭگە بولدى.
ۇلتتىق بانك بۇل قاراجاتتى قىسقا مەرزىمدى دەپوزيتتەرگە (171 ملرد تەڭگە)، ورتا جانە ۇزاق مەرزىمدى وبليگاسيالارعا (108 ملرد تەڭگە) جانە مەملەكەتتىك باعالى قاعازدارعا (741 ملرد تەڭگە) ورنالاستىردى.
جۇيەنىڭ تيىمدىلىگى
2023 جىلى الىنعان ينۆەستيسيالىق تابىس 113 ملرد تەڭگەنى قۇرادى. بۇل قاراجات ءمامس پاكەتىنىڭ بيۋدجەتىنە قوسىمشا 113 ملرد تەڭگە قوستى. 2022 جىلمەن سالىستىرعاندا ينۆەستيسيالىق كىرىس 1،6 ەسە ءوستى. بۇل قاراجات 2024 جىلدىڭ باسىندا مەديسينالىق ۇيىمدارمەن جاسالعان شارتتار بويىنشا 30% مولشەرىندە اۆانس تولەۋگە باعىتتالدى.
تاۋەلسىز اۋديت
الەۋمەتتىك مەديسينالىق ساقتاندىرۋ قورىنىڭ قارجى-شارۋاشىلىق قىزمەتى جانە ءمامس اكتيۆتەرى بويىنشا جىل سايىن تاۋەلسىز اۋديت جۇرگىزىلەدى. جىل قورىتىندىسى بويىنشا قارجىلىق ەسەپتىلىك ق ر قارجى مينيسترلىگىنىڭ دەپوزيتارييىندە جانە قوردىڭ رەسمي سايتىندا جاريالانادى. قور ق ر ۇكىمەتىندە جانە ق ر ۇكىمەتىنىڭ شوعىرلاندىرىلعان ەسەپتىلىگى شەڭبەرىندە ق ر پارلامەنتى دەپۋتاتتارىنىڭ الدىندا ۇنەمى ەسەپ بەرەدى.
بۇل جۇيە قازاقستاندىقتارعا مەديسينالىق قىزمەتتەردىڭ قولجەتىمدىلىگىن قامتاماسىز ەتىپ، جىل سايىن كورسەتىلەتىن مەديسينالىق قىزمەتتەردىڭ سانىن ۇلعايتۋعا مۇمكىندىك بەرەدى.