قازاقستاندىقتاردىڭ مەديسينالىق كومەك الۋ كەزىندە دەنساۋلىعىنا كەلتىرىلگەن زالال وتەلەدى.
مۇنداي نورما مەديسينا قىزمەتكەرلەرىنىڭ كاسىبي جاۋاپكەرشىلىگىن ساقتاندىرۋعا بايلانىستى جاڭا زاڭ جوباسىندا قاراستىرىلعان. بۇل تۋرالى ءماجىلىس دەپۋتاتى عالىمجان ەلەۋوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
دەنساۋلىق ساقتاۋ ماسەلەلەرىنە قاتىستى تۇزەتۋلەر ءقازىر ماجىلىستە قارالىپ جاتىر. ولاردى قابىلداۋ ناتيجەسىندە دەنساۋلىق ساقتاۋ ۇيىمدارى كورسەتەتىن مەديسينالىق قىزمەتتەردىڭ ساپاسى دا ارتتىرىلماق.
«ءتيىستى زاڭ جوباسىن دەنساۋلىق ساقتاۋ مينيسترلىگى مەملەكەت باسشىسىنىڭ ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا العا قويعان مىندەتتەرىن ىسكە اسىرۋ ماقساتىندا ازىرلەدى. پرەزيدەنت مەديسينا قىزمەتكەرلەرىنىڭ قۇقىقتىق جانە قارجىلىق قورعالۋى مەن جاۋاپكەرشىلىگىنە، ونىڭ ىشىندە كاسىبي قىزمەتىنە كەپىلدىك بەرەتىن جۇيەنى ازىرلەپ، ەنگىزۋدى تاپسىرعان بولاتىن.
حالىق دەنساۋلىعى جانە دەنساۋلىق ساقتاۋ جۇيەسى تۋرالى كودەكس پەن قىلمىستىق كودەكسكە، سونداي-اق «قازاقستان رەسپۋبليكاسىنىڭ مەملەكەتتىك ناگرادالارى تۋرالى» زاڭعا وزگەرىستەر مەن تولىقتىرۋلار ەنگىزۋ ۇسىنىلىپ وتىر. جالپى، تۇزەتۋلەر مەديسينا قىزمەتكەرلەرىنىڭ مارتەبەسىن ارتتىرۋعا، پاسيەنتتەر قۇقىقتارىن قورعاۋعا جانە مەديسينالىق كومەك ساپاسىن ارتتىرۋعا باعىتتالعان»، - دەيدى ءماجىلىس دەپۋتاتى، دارىگەر، مەديسينا عىلىمدارىنىڭ كانديداتى عالىمجان ەلەۋوۆ.
زاڭ جوباسى اياسىندا مەديسينا قىزمەتكەرلەرىنىڭ كاسىبي جاۋاپكەرشىلىگىن قولدانىستاعى ساقتاندىرۋ كومپانيالارى ارقىلى بولجامدى ساقتاندىرۋ جۇيەسى ازىرلەنگەن.
«2023 جىلدان باستاپ مەديسينالىق ۇيىمنىڭ ءوزى ساقتاندىرۋشى بولادى، ال 2025 جىلدان باستاپ مەديسينالىق ۇيىم مەن مەديسينا قىزمەتكەرى ساقتاندىرۋ جارنالارىن تەڭ ۇلەستە تولەيدى. بۇل بىرلەسكەن كاسىبي جاۋاپكەرشىلىككە اكەلەدى. بۇل رەتتە مەديسينالىق ۇيىم پاسيەنتتەردەن نەمەسە ولاردىڭ تۋىستارىنان تۇسكەن شاعىمداردى مەدياسيانى جانە مامانداندىرىلعان مەديسينالىق بىرلەستىكتەردى تارتا وتىرىپ ىشكى اۋديت قىزمەتى دەڭگەيىندە قارايتىن بولادى. كەلىسپەۋشىلىك تۋىنداعان جاعدايدا شاعىمدار ساراپتامالىق قورىتىندى بەرۋ ءۇشىن مەديسينالىق جانە فارماسيەۆتيكالىق باقىلاۋ كوميتەتىنىڭ اۋماقتىق بولىمشەلەرىنە بەرىلەدى»، - دەيدى دەپۋتات.
سونداي-اق، زاڭ جوباسىندا مەديسينا نەمەسە فارماسيەۆتيكا قىزمەتكەرىنىڭ كاسىبي مىندەتتەرىن تيىسىنشە ورىنداماعانى ءۇشىن قىلمىستىق قۇقىق بۇزۋشىلىقتاردى ىزگىلەندىرۋ جانە قىلمىستىق كودەكستىڭ 317-بابىنىڭ سانكسيالارىن ازايتۋ ۇسىنىلادى.
تۇزەتۋلەرگە مەملەكەتتىك جانە ۆەدومستۆولىق ناگرادالار دا ەنگىزىلەدى. ولار: ءبىرجولعى تولەممەن «قازاقستان رەسپۋبليكاسىنىڭ ەڭبەك سىڭىرگەن دارىگەرى» اتاعى، «ۇزدىك مامان» رەسپۋبليكالىق كونكۋرسىنىڭ جەڭىمپازى.
قازىرگى ۋاقىتتا زاڭ جوباسى قوعام بەلسەندىلەرى مەن دارىگەرلەردىڭ قاتىسۋىمەن جۇمىس توبىندا قارالىپ جاتىر.