بۇۇ-نىڭ «ەلەكتروندى ۇكىمەت» پورتالىنىڭ دامۋ دەڭگەيى رەيتينگىسىندە قازاقستان 28-ورىندا
وتانداستارىمىزدىڭ 81،2 پايىزى وتكەن جىلى مەملەكەتتىك قىزمەت كورسەتۋ ساپاسىنا قاناعاتتانارلىق باعا بەرگەن. بۇل تۋرالى مەملەكەتتىك قىزمەت ىستەرى اگەنتتىگى ءتوراعاسىنىڭ ورىنباسارى سالاۋات مۇكسىموۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«وتكەن جىلعى قوعامدىق مونيتورينگ ناتيجەسى ازاماتتاردىڭ 81،2%-ى مەملەكەتتىك قىزمەت كورسەتۋ ساپاسىنا قاناعاتتانعانىن كورسەتتى. بۇۇ-نىڭ «ەلەكتروندى ۇكىمەت» پورتالىنىڭ دامۋ دەڭگەيى رەيتينگىسىندە قازاقستان 28-ورىندا. ال، تمد كەڭىستىگىندە ەلىمىز كوش باستاپ تۇر. بۇل جەتىستىكتەر مەملەكەتتىك قىزمەت كورسەتۋ ساپاسىن ىلگەرىلەتىپ، زاڭنامانى جەتىلدىرۋدىڭ ارقاسىندا مۇمكىن بولىپ وتىر»، - دەدى سالاۋات مۇكسىموۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، اگەنتتىك مەملەكەت باسشىسى تاپسىرماسىن ورىنداۋ ماقساتىندا اكىمشىلىك راسىمدەردى بيۋروكراتيادان ارىلتۋ، تۇتىنۋشىعا باعدارلانعان جانە سەرۆيستىك مودەلگە كوشۋ جونىندە شارالار قابىلداپ جاتىر.
بۇعان دەيىن سالاۋات مۇكسىموۆ مەملەكەتتىك قىزمەت الۋدا ايىپپۇلدىڭ كەدەرگى بولماۋى كەرەكتىگىن ايتقان ەدى. مالىمدەۋىنشە، بۇگىندە مەملەكەتتىك قىزمەتتەردى قيىندىق، كەدەرگىسىز راسىمدەۋ، ياعني قىزمەت كورسەتۋدەن فورمالدى تۇردە باس تارتپاۋ جاعى قاراستىرىلىپ جاتىر.