10%-دىق وتەماقىنى الۋ ءۇشىن جىل سوڭىنا دەيىن ءوتىنىش بەرۋ قاجەت.
قازاقستاندا 5 ميلليوننان استام سالىمشى تەڭگەدەگى دەپوزيتتەر بويىنشا 10 پايىزدىق وتەماقى الا الادى، دەپ حابارلايدى Almaty-akshamy.kz
قازاقستاندىق بانكتەر جەكە تۇلعالاردىڭ 2022 جىلعى 23 اقپاندى قوسا العاندا اشىلعان تەڭگەدەگى دەپوزيتتەرى بويىنشا 10% وتەماقى (سىيلىقاقى) تولەۋگە ءوتىنىم قابىلداۋدى جالعاستىرىپ جاتىر.
قازاقستاننىڭ دەپوزيتتەرگە كەپىلدىك بەرۋ قورىنىڭ اقپاراتىنشا، 1 قىركۇيەكتەگى جاعداي بويىنشا 5 ميلليوننان استام سالىمشىنىڭ دەپوزيتىنە وتەماقى بەرىلەدى. ونىڭ ىشىندە سالىمشىلاردىڭ 97%-ىندە دەپوزيت مولشەرى –5 ملن تەڭگەگە دەيىن، باسىم بولىگى (86%) 1 ملن تەڭگەگە دەيىنگى دەپوزيتتى قۇرايدى.
«ءبىز سالىمشىلاردى وتەماقى الۋ مۇمكىندىگىن پايدالانۋعا شاقىرامىز. ەگەر سىزدە 2022 جىلدىڭ 23 اقپانىنا دەيىن دەپوزيت اشىلعان بولسا، ءسىزدىڭ بۇل سىيلىقاقىنى الۋعا قۇقىعىڭىز بار. وتەماقى الۋ ءۇشىن دەپوزيتتىڭ شەكتى سوماسى 20 ملن تەڭگە بولعانىمەن، ستاتيستيكا كورسەتكەندەي، وتەماقىعا، نەگىزىنەن، 1 ملن تەڭگەگە دەيىنگى دەپوزيتتەر ىلىگىپ جاتىر»، - دەدى قدكبق ءتوراعاسى ءادىل وتەمبايەۆ.
وتەماقى الۋ ءۇشىن سالىمشى 2023 جىلدىڭ 1 قاڭتارىنا دەيىن ءوتىنىش بەرۋ ارقىلى كەلىسىمىن راستاۋى كەرەك. كەيبىر بانكتەردە تولەمگە ونلاين ءوتىنىش بەرۋ مۇمكىندىگى بار.
بانكتەر وتەماقىنىڭ ءوزىن 2023 جىلدىڭ 23 اقپانىنان كەيىن اۋدارا باستايدى.
ايتا كەتەرى، وتەماقى جيناق، مەرزىمدى، مەرزىمسىز، سونداي-اق ءبىلىم بەرۋ جيناقتاۋ سالىمدارى مەن تۇرعىن ءۇي قۇرىلىس جيناقتارى جۇيەسىندەگى دەپوزيتتەرگە بەرىلەدى.