اپتاسىنا 5 كۇن جۇمىس ىستەيتىن قازاقستان ازاماتتارى شىلدە ايىندا 11 كۇن دەمالادى.
شىلدە ايىندا قازاقستاندىقتار استانا كۇنى مەن قۇربان ايت مەيرامىن تويلايدى، دەپ حابارلايدى Almaty-akshamy.kz.
قازاقستان رەسپۋبليكاسىنداعى ۇلتتىق جانە مەملەكەتتىك مەرەكەلەر اتاپ وتىلەتىن كۇندەر ەلىمىزدىڭ ەڭبەك زاڭدارىنا سايكەس مەرەكە كۇندەرى دەپ تانىلادى. مەرەكە كۇندەرى جۇمىس ىستەمەيتىن كۇندەر بولىپ تابىلادى. ال بيىل مەملەكەتتىك مەرەكە سانالاتىن استانا كۇنى 6 شىلدە سەيسەنبىگە كەلىپ تۇر. قۇربان ايت مەيرامى دا 20 شىلدە سەيسەنبىگە ءدوپ تۇسەدى. ال 3 كۇنگە سوزىلاتىن بۇل ءدىني مەيرامنىڭ ءبىرىنشى كۇنى ەلىمىزدە دەمالىس رەتىندە جاريالانعان. سوندىقتان 6 جانە 20 شىلدە كۇندەرى دەمالىس سانالادى. دەمەك، اپتاسىنا 5 كۇن جۇمىس ىستەيتىن قازاقستان ازاماتتارى شىلدە ايىندا 11 كۇن دەمالادى.
ايتا كەتەيىك، ورازا ايتتان 70 كۇننەن كەيىن تويلاناتىن قۇربان ايتتا جاعدايى بار ءارى جولاۋشى ەمەس مۇسىلمانعا قۇرباندىق شالۋ - ءۋاجىپ، مۇسىلماندىق مىندەت. قۇرباندىققا تۇيە، سيىر جانە قوي (ەشكى دە) شالىنادى. قۇرباندىق ەتىنىڭ ءبىر بولىگى وزىنە قالادى، ەكىنشى بولىگى اعايىن-تۋىس، كورشىلەرگە بەرىلەدى، ءۇشىنشى بولىگى كومەككە مۇقتاج جاندارعا تاراتىلادى.