«سارى» جانە «قىزىل» مارتەبەسى بار جەكە تۇلعالاردىڭ الاكول ايماعىنا بارۋىنا تىيىم سالىنادى.
شەتەل ازاماتتارىنىڭ مارتەبەسىن تەكسەرۋ ءۇي-جايعا كىرۋدى باقىلايتىن قىزمەتكەردىڭ Ashyq قوسىمشاسىنا پاسپورت ءنومىرىن ەنگىزۋ ارقىلى جۇزەگە اسىرىلادى، دەپ حابارلايدى Almaty-akshamy.kz ق ر دەنساۋلىق ساقتاۋ مينيسترلىگىنىڭ باسپا ءسوز قىزمەتىنە سىلتەمە جاساي وتىرىپ.
قىزمەتكەرلەر مەن دەمالۋشى تۋريستەردىڭ قاۋىپسىزدىگى مەن الاكول كولىنىڭ جاعالاۋىندا كوروناۆيرۋستىق ينفەكسياسىنىڭ تارالۋىن بارىنشا ازايتۋ كاسىپكەرلىك سۋبەكتىلەرىنىڭ «ەرىكتى» قاتىسۋشىلار فورماتىندا Ashyq جوباسىن ەنگىزۋى ارقىلى قامتاماسىز ەتىلەدى.
مۇنىمەن قوسا، دەمالىس ايماعىندا كۇشەيتىلگەن سانيتاريالىق-دەزينفەكسيالىق رەجيم، تەرمومەتريا، بەتپەردە كيۋ ءتارتىبى جانە الەۋمەتتىك قاشىقتىق ساقتالاتىن بولادى.
كاسىپكەرلەر نەمەسە كەلۋشىلەردى دەمالىس جانە تۇرۋ ورىندارىندا ورنالاستىرۋعا جاۋاپتى تۇلعالارعا، سونداي-اق كولدىڭ تۋريستىك-رەكرەاسيالىق ايماعىندا ورنالاسقان قىزمەت كورسەتۋشى وزگە دە وبەكتىلەرگە قونىستاناتىن دەمالۋشىلاردىڭ «جاسىل» جانە «كوك» مارتەبەسىن QR-كود نەمەسە جسن ارقىلى تەكسەرگەن كەزدە عانا جۇمىس ىستەۋگە رۇقسات ەتىلگەن.
كەلۋشىلەر بەرىلگەن كۇنىنەن ءۇش تاۋلىكتەن اسپايتىن، تەرىس ناتيجەسى بار پتر ادىسىمەن جۇرگىزىلگەن زەرتحانالىق تەكسەرۋ تۋرالى قۇجاتتى (ەرىپ جۇرۋشىلەردە انىقتاما بولعان كەزدە 5 جاسقا دەيىنگى بالالاردى قوسپاعاندا) نەمەسە كوروناۆيرۋستىق ينفەكسياسىنا قارسى ۆاكسيناسيالاۋدىڭ تولىق كۋرسىن العانىن راستايتىن قۇجاتتى ۇسىنعان كەزدە، ولار تۋريستىك-رەكرەاسيالىق ايماق وبەكتىلەرىنە ءوز ستاتۋسىن تەكسەرمەي كىرە الادى.
سونىمەن قاتار، ەڭبەككە ۋاقىتشا جارامسىزدىعىن راستايتىن قۇجاتتى ۇسىنعان ازاماتتاردىڭ دەمالىس ايماعىنا ستاتۋسىن تەكسەرمەي كىرۋىنە رۇقسات بەرىلەدى.
شىعىس قازاقستان وبلىسىنىڭ باس مەملەكەتتىك سانيتاريالىق دارىگەرىنىڭ «شىعىس قازاقستان وبلىسىنىڭ بۇقتىرما سۋ قويماسىنىڭ، «الاكول» كولىنىڭ جانە «راحمان قاينارلارى» ءساناتورييىنىڭ تۋريستىك-رەكرەاسيالىق ايماقتارىندا COVID-19 كوروناۆيرۋستىق ينفەكسيا اۋرۋىنىڭ اكەلىنۋى مەن تارالۋىنىڭ الدىن الۋ جونىندەگى شارالار تۋرالى» 23 مامىرداعى قاۋلىسىنا سايكەس، الاكول كولىنىڭ جاعالاۋىنا كەلەتىن ازاماتتار ءۇشىن پتر ادىسىمەن COVID-19-عا مىندەتتى زەرتحانالىق تەكسەرۋ جۇرگىزۋ جانە ونىڭ ناتيجەلەرىن ۇسىنۋ تالابى قويىلمايدى.
ايتا كەتەيىك، Ashyq جوباسىنا قاتىساتىن تاسىمالداۋشىلاردى قوسپاعاندا، وبلىسارالىق جانە قالالىق تۇراقتى ەمەس (تۋريستىك) تاسىمالدار بەلگىلى ءبىر شەكتەۋلەرمەن جۇزەگە اسىرىلماق.