بۇل تۋرالى سىرتقى ىستەر مينيسترلىگى تۇسىنىكتەمە بەردى.
سىرتقى ىستەر مينيسترلىگىنىڭ رەسمي وكىلى ايبەك سمادياروۆ وتكەن جىلدىڭ ماۋسىم ايىنان 2023 جىلدىڭ قاڭتارىنا دەيىن، قازاقستان رەسپۋبليكاسىنىڭ تايلاندتاعى ەلشىلىگى قازاقستان رەسپۋبليكاسىنىڭ 14 ازاماتىنا كومەك كورسەتكەنىن ايتتى، دەپ حابارلايدى Almaty-akshamy.kz
بۇل ازاماتتار ءۇش مەملەكەتتىڭ شەكاراسىنداعى «التىن ءۇشبۇرىش» ياعني تايلاند، ميانما جانە لاوس مەملەكەتتەرىندە بولعان.
«بۇل جىگىتتەردىڭ ايتۋىنشا، ولار بولعان كومپانيادا باسقا قازاقتار جوق. ءبىراق "التىن ءۇشبۇرىش" اتالىپ كەتكەن ەلدەردە بولۋى مۇمكىن»، - دەدى ول.
ونىڭ ايتۋىنشا، ادامداردى قۇلدىققا تارتۋ سحەماسى وتە قاراپايىم: شەتەلدە ءىرى ينۆەستيسيا نەمەسە باسقا كومپانيادا جوعارى اقى تولەنەتىن جۇمىسقا جارناما ورنالاستىرىلادى. بۇل رەتتە جالاقى 2 مىڭنان 3 مىڭ دوللارعا دەيىن ۋادە ەتىلەدى.
«ارينە، ءتىل ءبىلۋ كەرەك، ءبىر قىزىعى، شەتەلدە ءبىلىم العان جوعارى ءبىلىمى بار ازامات قايدا باراتىنىن ءتۇسىنۋى كەرەك ەدى. مۇندايدا بۇل جىگىتتەر (قۇلدىقتان قۇتقارىلعان ەكى جىگىت – رەد.) جۇڭگو ءتىلىن بىلەدى، ءبىر كەزدەرى قىتايدا وقىپ، باا-نە بارىپ، وسى كومپانيانى سول جەردەن تاۋىپ الادى. ولارعا قىتايلىق كومپانياعا جۇمىسقا ورنالاسۋعا ۋادە بەرگەن، ءبىراق كەڭسە تايلاندتا ورنالاسقان دەپ ايتقان. جۇمىس بەرۋشىلەر قوس ازاماتتىڭ رەيسى مەن ءقوناقۇيىن، ءتىپتى باسقا دا شىعىندارىن تولەگەن. تايلاندقا كەلگەننەن كەيىن ولاردى كولىككە سالىپ، ميانماعا الىپ كەتكەن. ناتيجەسىندە الاياقتىق قۇرباندارى بولىپ شىقتى - كەلگەننەن كەيىن بۇل ءىرى كومپانيا ەمەس، ماينينگپەن، كريپتوۆاليۋتامەن اينالىساتىن قاراپايىم كومپانيا بولىپ شىققان»، دەدى ايبەك سمادياروۆ.