«جولاۋشىلار تاسىمالى» اق جولاۋشىلارعا ارنالعان «پويىز قوزعالىسىنىڭ ونلاين تاقتاسى» اتتى جاڭا سيفرلىق سەرۆيستى قولدانىسقا ەنگىزدى.
ەندى جولاۋشىلار ناقتى ۋاقىت رەجيمىندە پويىزداردىڭ كەلۋ جانە كەتۋ ۋاقىتىن باقىلاپ، قوزعالىس كەستەسىندەگى وزگەرىستەر تۋرالى جەدەل اقپارات الا الادى، دەپ حابارلايدى aqshamnews.kz.
Rail-news.kz مالىمەتىنشە، اتالعان قىزمەت «جولاۋشىلار تاسىمالى» اق سيتۋاسيالىق ورتالىعى اياسىندا ازىرلەندى.
ورتالىق جولاۋشىلار پويىزدارىنىڭ قوزعالىسىن تاۋلىك بويى باقىلاپ، مونيتورينگ جۇرگىزەدى. پويىزدارعا ورناتىلعان GPS-ترەكەرلەر دەرەكتەردى اۆتوماتتى تۇردە ورتالىققا جىبەرىپ، پويىزداردىڭ ورنالاسقان جەرىن ءدال انىقتاۋعا جانە قوزعالىس كەستەسىن جەدەل جاڭارتۋعا مۇمكىندىك بەرەدى. جاڭا سەرۆيس جولاۋشىلارعا bilet.railways.kz رەسمي سايتىندا قولجەتىمدى، - دەلىنگەن مالىمەتتە.
پويىز قوزعالىسى تۋرالى اقپارات الۋ ءۇشىن:
- https://bilet.railways.kz سايتىنا كىرۋ قاجەت.
- «پويىز قوزعالىسىنىڭ ونلاين تاقتاسى» باننەرىن باسۋ كەرەك.
- كارتادان قاجەتتى پويىزدى تاڭداۋ قاجەت.
- سونداي-اق قىزمەتكە https://tablo-railways.kz/ru/ سايتى ارقىلى دا كىرۋگە بولادى.
«پويىز قوزعالىسىنىڭ ونلاين تاقتاسى» جولاۋشىلارعا ناقتى ۋاقىت رەجيمىندە پويىزدىڭ قوزعالىسىن كارتادان باقىلاۋعا (پويىز قىزىل تۇسپەن بەلگىلەنەدى)، تاڭداعان ستانسياداعى كەلۋ جانە جونەلتۋ كەستەسىن تەكسەرۋگە، قوزعالىس كەستەسىندەگى وزگەرىستەردى باقىلاۋعا، بارلىق ايالداما ستانسيالارىن، ولاردىڭ كۇتۋ ۋاقىتىن جانە مەجەلى بەكەتكە شامامەن كەلۋ ۋاقىتىن كورۋگە مۇمكىندىك بەرەدى، - دەپ تولىقتىردى كومپانيا.
Tablo-railways.kz سايتىندا پويىز بيلەتتەرىن ونلاين ساتىپ الۋ، ەلەكتروندى وتىرعىزۋ تالونىن الۋ، ورىنداردى تالاپ-شاعىم بويىنشا قايتارۋ، پويىزدار كەستەسىن قاراۋ جانە جۇكتەردىڭ قۇنىن ەسەپتەۋ سياقتى قوسىمشا قىزمەتتەر قولجەتىمدى.