بەس كۇندە قازاقستاندىقتار اباي وبلىسىنىڭ تۇرعىندارى ءۇشىن 165 ميلليون تەڭگە جينادى.
Kaspi.kz نيەت بىلدىرگەندەردىڭ بارلىعى ورتتەن زارداپ شەككەندەرگە كومەكتەسە الۋى ءۇشىن ۇلتتىق ۆولونتەرلىك جەلىمەن بىرگە ونلاين، ءموبيلدى قوسىمشا ارقىلى تەز ارادا قاراجات جيناۋعا مۇمكىندىك جاسادى، دەپ حابارلايدى Almaty-akshamy.kz
Kaspi.kz ءوز تاراپىنان ورتتەن زارداپ شەككەندەر ءۇشىن 35 ميلليون تەڭگە قوسىپ، سومانى 200 ميلليون تەڭگەگە دەيىن ۇلعايتتى.
"ءبىز مۇنداي ۇلكەن رەزونانستى كۇتكەن دە جوقپىز. قايىرىمدىلىق كولەمى ءارتۇرلى بولدى. بىرەۋ "ۇلىمنان" دەپ 50 تەڭگە اۋدارسا، بىرەۋ قوماقتى سوما جىبەرگەن. قاراجاتتىڭ ءبىر بولىگىن ءورت سوندىرۋشىلەردى، قۇتقارۋشىلاردى قولداۋعا، ازىق-تۇلىك پەن قاجەتتى زاتتاردى ساتىپ الۋعا بولەمىز. تاعى ءبىر بولىگى – زارداپ شەككەندەردىڭ وتباسىلارىنا كومەك كورسەتۋگە. قالعان سوماعا جابىرلەنۋشىلەردىڭ كامەلەتكە تولماعان بالالارىنا دەپوزيت اشۋدى جوسپارلاپ وتىرمىز. بۇل سەگىز بالا كامەلەتكە تولعان سوڭ اقشانى وقۋعا، تۇرعىن ءۇي جاعدايىن جاقسارتۋعا نەمەسە باسقا دا ماڭىزدى ماقساتتارعا جۇمساي الادى. ءۇن قوسىپ، كومەكتەسكەندەردىڭ بارلىعىنا راحمەت!"، دەدى "ۇلتتىق ۆولونتەرلىك جەلى" زتب اتقارۋشى ديرەكتورى تاتيانا ميرونيۋك.
Kaspi.kz باسشىسى جانە نەگىزىن قالاۋشىلاردىڭ ءبىرى ميحايل لومتادزە بانك كليەنتتەرىنە العىسىن ايتتى.
"قيىندىققا تاپ بولعان ادامداردى قولداۋ تۋرالى شەشىم قابىلداعان بارلىق سۇيىكتى، قامقور كليەنتتەرىمىزگە راحمەت. Kaspi قيىن جاعدايدا قازاقستاندىقتارعا ءارقاشان كومەكتەسەدى جانە شەتتە قالمايدى. قازا تاپقانداردىڭ وتباسىلارىنا كوڭىل ايتامىز جانە ءورت سالدارىنان زارداپ شەككەندەردىڭ بارلىعىنىڭ قايعىسىنا ورتاقپىز"، دەدى ميحايل لومتادزە.