قازاقستاندىقتار ءولىم جازاسىن كونستيتۋسيادان تۇپكىلىكتى الىپ تاستاي الادى

بۇل تۋرالى ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ عىلىمي قىزمەتكەرى ايدانا اكەسينا مالىمدەدى. دەپ حابارلايدى Almaty-akshamy.kz  BAQ.KZ-كە سىلتەمە جاساپ.
قازاقستان حالقى اسسامبلەياسىنىڭ XXXI سەسسياسىندا پرەزيدەنت قاسىم-جومارت توقايەۆ ق ر كونستيتۋسياسىنا تۇزەتۋلەر ەنگىزۋ بويىنشا رەفەرەندۋم وتكىزۋ تۋرالى ۇسىنىس ايتتى. سونىمەن قاتار ناۋرىزداعى جولداۋىندا ايتىلعان ساياسي رەفورمالار باعدارلاماسى 33 كونستيتۋسيالىق تۇزەتۋدى بىلدىرەدى. كونستيتۋسيالىق رەفەرەندۋم، تىكەلەي دەموكراتيانىڭ قۇرالى رەتىندە ءبىزدىڭ ەلدە 1995 جىلعى جاڭا كونستيتۋسيا قابىلدانعانعا دەيىن ءبىر رەت قولدانىلعانىن اتاپ وتكەن ءجون. 2022 جىلى، 27 جىل وتكەننەن كەيىن ەل ازاماتتارى ەلدىڭ اتا زاڭىنا ەنگىزىلەتىن ماڭىزدى وزگەرىستەر ءۇشىن داۋىس بەرۋ مۇمكىندىگىنە يە بولادى، - دەپ اتاپ ءوتتى ينستيتۋتتىڭ عىلىمي قىزمەتكەرى. 
سونىمەن قاتار ول رەفەرەندۋمدار وتكىزۋ حالىقتان داۋىس بەرۋگە قويىلعان ماسەلە تۋرالى تەرەڭ حاباردار بولۋدى تالاپ ەتەتىندىگىن العا تارتتى. سوندىقتان ۇسىنىلعان تۇزەتۋلەردىڭ ءارقايسىسى بويىنشا كولەمدى ءتۇسىندىرۋ جۇمىسىن جۇرگىزۋ بيلىك ورگاندارى مەن ساراپشىلار قوعامداستىعى ءۇشىن باستى مىندەت بولادى دەپ وتىر. 
كونستيتۋسياعا تۇزەتۋلەر بيلىكتى قايتا ءبولۋ، پرەزيدەنتتىڭ وكىلەتتىگى، سايلاۋ جۇيەسى، ەلدىڭ جاڭا اكىمشىلىك-اۋماقتىق ءبولىنىسى سياقتى ىرگەلى مەملەكەتتىك ماسەلەلەر بويىنشا ەنگىزىلەدى. جاڭا تۇزەتۋلەر، باسقالارىمەن قاتار، قازاقستاننىڭ ءولىم جازاسىنان باس تارتۋىن تۇپكىلىكتى بەكىتەتىنىن اتاپ ءوتۋ قاجەت. كونستيتۋسيانىڭ قازىرگى رەداكسياسىندا 15-باپ ءولىم جازاسىنا تارتۋ ادامداردىڭ قازا بولۋىمەن بايلانىستى تەرروريستىك قىلمىستار جاساعانى ءۇشىن، سونداي-اق سوعىس ۋاقىتىندا ەرەكشە اۋىر قىلمىستار جاساعانى ءۇشىن كوزدەلگەن، ونداي جازاعا كەسىلگەن ادامنىڭ كەشىرىم جاساۋ تۋرالى ءوتىنىش بەرۋ قۇقىعى قولدانىلاتىن ەڭ اۋىر جازا، - دەدى ايدانا اكەسينا. 
ونىڭ ايتۋىنشا، 2021 جىلى قازاقستان ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىنىڭ ەكىنشى فاكۋلتاتيۆتىك حاتتاماسىن راتيفيكاسيالادى.
كونستيتۋسياعا ەنگىزىلەتىن قازىرگى تۇزەتۋلەر وسى ەڭ جوعارى جازادان باس تارتۋ راسىمىندەگى اقىرعى نۇكتە بولادى. ەلدىڭ اتا زاڭىنا تۇزەتۋلەر ەنگىزۋ جونىندەگى رەفەرەندۋمنىڭ زور تاريحي ماڭىزى بار. بۇل رەتتە ساياسي مادەنيەت دەڭگەيىن ارتتىرۋ جانە باسقارۋ پروسەستەرىنە قاتىسۋ قوعام ءۇشىن قوسىمشا ارتىقشىلىققا يە، - دەيدى سپيكەر.