قازاقستاننىڭ ۇلتتىق بانكى ەلدەگى نەسيەلەۋ نارىعىنىڭ جاعدايىن جاريالادى. ءبىر قىزىعى مالىمەتتەردى ەكىنشى دەڭگەيلى بانكتەر ۇسىنعان، دەپ حابارلايدى aqshamnews.kz.
ۇلتتىق بانك قارجىلىق تۇراقتىلىق جانە زەرتتەۋلەر دەپارتامەنتىنىڭ ديرەكتورى ولجاس كۋبەنبايەۆتىڭ ايتۋىنشا، ءۇشىنشى توقساندا جەكە تۇلعالار تاراپىنان يپوتەكا مەن اۆتوكرەديتتەرگە سۇرانىس ارتقان. ال كەپىلسىز نەسيەلەر مەن كەپىلمەن تۇتىنۋشىلىق نەسيەلەرگە سۇرانىس ازايعان.
«يپوتەكاعا سۇرانىستىڭ ءوسۋىن بانكتەر مەملەكەتتىك باعدارلامالار اياسىندا وتىنىمدەر جيناۋ جانە قۇرىلىسشىلارمەن ىنتىماقتاستىقپەن تۇسىندىرەدى. يپوتەكالىق ونىمدەرگە سۇرانىستىڭ ارتۋىنا باسەكەلەس بانكتەردىڭ كەپىلدىك قامتاماسىز ەتۋگە قاتاڭ تالاپتار قويۋى دا اسەر ەتتى. ناتيجەسىندە، جالپى كرەديتتىك وتىنىمدەر سانى وتكەن توقسانمەن سالىستىرعاندا 31%-عا ارتىپ، 274 مىڭعا جەتتى»، — دەدى ولجاس كۋبەنبايەۆ.
قازاقستاندىقتار اۆتوكرەديتتەرگە دە ءجيى ءوتىنىش بەرە باستادى. وتكەن توقسانمەن سالىستىرعاندا بۇل كورسەتكىش 10%-عا ارتىپ، 1،1 ميلليوندى قۇرادى. بۇل جاعداي اۆتوسالونداردىڭ بانكتەر-پارتنەرلەر ارقىلى ءوز قىزمەتتەرىن بەلسەندى تۇردە جارنامالاۋمەن دە بايلانىستى.
«2024 جىلدىڭ ءتورتىنشى توقسانىندا بانكتەر اۆتوكرەديتتەر مەن كەپىلسىز تۇتىنۋشىلىق نەسيەلەرگە سۇرانىستىڭ ارتۋىن كۇتەدى. ال يپوتەكاعا جانە كەپىلمەن بەرىلەتىن تۇتىنۋشىلىق نەسيەلەرگە سۇرانىس وسپەيدى»، — دەپ اتاپ ءوتتى و.كۋبەنبايەۆ.
2024 جىلدىڭ ءۇشىنشى توقسانىندا قازاقستاندىق بانكتەر بيزنەسكە، اسىرەسە ورتا جانە ءىرى بيزنەسكە، نەسيەلەردى ءجيى ماقۇلداي باستادى. الايدا، بيزنەس نەسيەلەرىنە سۇرانىس بۇرىنعى دەڭگەيدە ساقتالدى. ءىرى جانە شاعىن كاسىپورىندار وتكەن توقسانمەن سالىستىرعاندا ءۇش پايىزعا ءجيى نەسيەگە جۇگىنگەن.
شاعىن بيزنەس تاراپىنان 845 مىڭ نەسيەلىك ءوتىنىم كەلىپ ءتۇستى، ءبىراق ولاردىڭ تەك ءاربىر ءۇشىنشىسى (35%) ماقۇلداندى. ورتا بيزنەستىڭ 41%-ى، ءىرى بيزنەستىڭ 51%-ى كرەديت الدى.
بانكتەردىڭ پىكىرىنشە، 2024 جىلدىڭ سوڭعى توقسانىندا بيزنەس نەسيەلەرىنە سۇرانىستىڭ ودان ءارى وسەتىنى كۇتىلۋدە.