الماتى وبلىسىندا وتكەن اپتادا كوشى-قون زاڭناماسىن بۇزعانى ءۇشىن 270 شەتەلدىك ازامات انىقتالدى.
تەكسەرۋ ناتيجەسىندە ولاردىڭ 14ء-ى قازاقستان اۋماعىنان شىعارىلدى، دەپ حابارلايدى aqshamnews.kz Polisia.kz-كە سىلتەمە جاساپ.
– ءبىز كوشى-قون سالاسىنداعى قۇقىق بۇزۋشىلىقتاردى انىقتاۋ جانە الدىن الۋ بويىنشا جۇيەلى جۇمىستار جۇرگىزۋدەمىز. بۇل ءىس-شارالاردىڭ نەگىزگى ماقساتى – قۇقىقتىق ءتارتىپتى قامتاماسىز ەتىپ، ازاماتتاردىڭ قاۋىپسىزدىگىن ساقتاۋ. ەلىمىزدىڭ اۋماعىندا بولۋدى جوسپارلاعان شەتەلدىكتەر بەلگىلەنگەن ەرەجەلەردى قاتاڭ ساقتاۋى قاجەت، – دەپ مالىمدەدى وبلىستىق كوشى-قون قىزمەتى باسقارماسىنىڭ وكىلدەرى.
دەپورتاسيانىڭ نەگىزگى سەبەپتەرى – زاڭسىز ەڭبەك قىزمەتىمەن اينالىسۋ، ەلدە بولۋ مەرزىمىن اسىرۋ جانە اكىمشىلىك قاداعالاۋدان جالتارۋ. سونىمەن قاتار كوشى-قون زاڭناماسىن بۇزعانى ءۇشىن قازاقستاننىڭ 119 ازاماتى دا اكىمشىلىك جاۋاپكەرشىلىككە تارتىلدى. قۇقىق قورعاۋ ورگاندارى شەتەل ازاماتتارىنا كوشى-قون زاڭناماسىنىڭ تالاپتارىن بۇلجىتپاي ورىنداۋعا، قاجەتتى قۇجاتتاردى ۋاقىتىلى راسىمدەۋگە شاقىرادى. ەگەر قانداي دا ءبىر سۇراقتار تۋىنداسا، جاقىن ماڭداعى كوشى-قون پوليسياسى بولىمشەسىنە جۇگىنۋگە كەڭەس بەرەدى.