حالىق اراسىندا التىنعا ينۆەستيسيا قۇيۋ قىزىعۋشىلىعى ارتقان
2022 جىلعى ناۋرىزدا ەكىنشى دەڭگەيلى بانكتەر مەن جەكەلەگەن بانكتىك ەمەس ايىرباستاۋ پۋنكتەرى جالپى سالماعى 167،2 كەلى 8 269 التىن قۇيماسىن ساتتى. بۇل 2021 جىلدىڭ وسى كەزەڭىمەن سالىستىرعاندا 3 ەسە كوپ، دەپ حابارلايدى Almaty-akshamy.kz Elorda.info-عا سىلتەمە جاساپ.
ۇلتتىق بانكتىڭ حابارلاۋىنشا، ساتىلىمنىڭ ۇلعايۋىنا التىنعا ينۆەستيسيا قۇيۋعا قىزىعۋشىلىعى ارتقان حالىقتىڭ سۇرانىسى ىقپال ەتىپ وتىر. سەبەبى قارجى نارىعىنداعى بەلگىسىزدىك پەن ۆاليۋتا باعامى قۇبىلمالى بولىپ تۇرعان شاقتا كوپشىلىك بۇعان جيناقتارىنىڭ ساقتالۋىن قامتاماسىز ەتۋدىڭ بالامالى قۇرالى رەتىندە قارايدى.
حالىققا تازارتىلعان التىن قۇيمالاردى ساتۋ جانە ساتىپ الۋ باعدارلاماسىن ۇلتتىق بانك 2017 جىلى ىسكە قوسقان ەدى. باعدارلاما قولعا الىنعالى جالپى سالماعى 3 تونناعا جۋىق 87 531 التىن قۇيما ساتىلدى.
«التىن قۇيمالار بەس ءتۇرلى سالماقتا ۇسىنىلادى: 5، 10، 20، 50 جانە 100 گ. ساتىپ الۋشىلار اراسىندا وتە جوعارى سۇرانىسقا يە ءتۇرى – 10 گرامدىق قۇيما. جالپى ساتىلعان قۇيمالار اراسىندا ونىڭ ۇلەسى – 27%، ياعني، 23 390 دانا. ودان كەيىن 20 گرامدىق قۇيما سۇرانىسقا يە، 18 178 دانا (21%)، 100 گرامدىق قۇيمادان 18 034 دانا (20%)، 5 گرامدىق قۇيمادان 16 834 دانا (19%)، 50 گرامدىق قۇيمادان 11 095 دانا (13%) ساتىلدى. التىن قۇيمالار الماتى، نۇر-سۇلتان جانە اتىراۋ قالالارىندا كوپ ساتىلادى»، - دەلىنگەن حابارلامادا.
التىن قۇيمالار سەنىمدى ينۆەستيسيا قۇرالى بولا الادى. التىن قۇيمالار نارىعىنداعى وتىمدىلىكتىڭ باستى كەپىلى – بانك پەن بانكتىك ەمەس ايىرباستاۋ پۋنكتەرى كليەنتكە اقشانى سول كۇنى تولەي وتىرىپ، التىن قۇيمالاردى كەرى ساتىپ الا الادى.
باعدارلاما باستالعاننان بەرى ەكىنشى دەڭگەيلى بانكتەر مەن جەكەلەگەن بانكتىك ەمەس پۋنكتەر جالپى سالماعى 303،3 كەلى 12 367 التىن قۇيمانى كەرى ساتىپ العان، بۇل – جالپى ساتىلعان التىن قۇيمالاردىڭ 14%-ى. ولار كەرى ساتىپ العان التىن قۇيمالاردىڭ بارلىعى ۇلتتىق بانكتىڭ فيليالدارى ارقىلى حالىققا ساتىلادى.
«ءاربىر قۇيما قورعاۋ ەلەمەنتتەرىمەن قاپتالعان (قۇيمانىڭ اينا بەتى، ميكروتەكست جانە جيەگى بار) جانە ارنايى قوراپپەن شىعارىلادى، سول ارقىلى قۇيمانىڭ اشىلعان-اشىلماعانىن وڭاي تەكسەرۋگە بولادى. قورعانىش قورابى، سونداي-اق ساپا سەرتيفيكاتى بولىپ سانالادى. سوندىقتان التىن قۇيمانى ۇقىپپەن ساقتاپ، قورابىن بۇلدىرمەۋگە كەڭەس بەرەمىز»، - دەلىنگەن حابارلامادا.
ءقازىر التىن قۇيمالاردى Halyk Bank، ەۋرازيالىق بانك، Jusan Bank، سەنتركرەديت بانكى، سونداي-اق جەكەلەگەن بانكتىك ەمەس پۋنكتەردەن ساتىپ الىپ، كەرى ساتۋعا بولادى.