حالىق ساناعىنان ونلاين ءوتۋ مۇمكىندىگى قايتا قولجەتىمدى، دەپ حابارلايدى almaty-akshamy.kz ۇلتتىق ستاتيستيكا بيۋروسىنىڭ باسپا ءسوز قىزمەتىنە سىلتەمە جاساپ.
ساناقتان ونلاين ءوتۋ مۇمكىندىگى توقتاتىلعان سوڭ، ەلىمىزدىڭ بارلىق وڭىرلەرىنەن، اسىرەسە قالالاردان ونلاين ساناق فۋنكسياسى مەرزىمىن ۇزارتۋ تۋرالى كوپتەگەن ءوتىنىش تۇسە باستادى. وسىعان بايلانىستى sanaq.gov.kz سايتىندا ونلاين ساۋالناما فۋنكسياسىن قايتا قوسۋ تۋرالى شەشىم قابىلداندى، - دەلىنگەن حابارلامادا.
ساناق ساۋالدارىنا ارنايى sanaq.gov.kz سايتى، E-Gov پورتالى ارقىلى تىركەلىپ نەمەسە Aitu ءموبيلدى قوسىمشاسى ارقىلى جاۋاپ بەرۋگە بولادى. ونلاين ءوتۋ مۇمكىندىگى حالىق ساناعى اياقتالعانعا دەيىن قولجەتىمدى بولماق.
ايتا كەتەيىك، 1 قىركۇيەك پەن 15 قازان ارالىعىندا ونلاين-ساناق فۋنكسياسىن ازاماتتاردىڭ 40 پايىزعا جۋىعى پايدالانعان. 1 قازاننان باستاپ ينتەرۆيۋەرلەر ءۇي-ۇيدى ارالاۋدى باستادى. ولار ءقازىردىڭ وزىندە 5 938 259 ادامعا ساۋال سالۋ جۇرگىزدى. ونلاين وتكەن رەسپوندەنتتەر كەلگەن حابارلامانى ينتەرۆيۋەرلەرگە كورسەتۋى ءتيىس. ولارمەن ساۋالناما قايتا جۇرگىزىلمەيدى.
ۇلتتىق ستاتيستيكا بيۋروسى ون جىلدىقتىڭ ماڭىزدى شاراسىنا ات سالىسۋعا شاقىرا وتىرا بەلسەندىلىك تانىتىپ، حالىق ساناعىنا قاتىسقان ازاماتتارعا العىس ايتادى. قازاقستاندا اركىم ماڭىزدى!