ەندىگى ۋاقىتتا قازاقستاندىقتار شومىلۋعا رۇقسات بەرىلگەن نەمەسە تىيىم سالىنعان سۋ ايدىندارى تۋرالى مالىمەتتى ءموبيلدى قوسىمشانىڭ كومەگىمەن انىقتاي الادى.
بۇل تۋرالى ق ر تجم ازاماتتىق قورعانىس جانە اسكەري بولىمدەر كوميتەتىنىڭ ءتوراعاسى باۋىرجان سىزدىقوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ەرەسەكتەر مەن بالالاردىڭ سۋداعى قاۋىپسىزدىگىن قامتاماسىز ەتۋگە باعىتتالعان اقپاراتتىق-پروفيلاكتيكالىق جۇمىس ۇزدىكسىز جۇرگىزىلىپ كەلەدى. جىل باسىنان بەرى باق-قا ارنالعان 135 بريفينگ ءوتتى. راديو جانە تەلەديدارلاردا ءبىزدىڭ وكىلدەر 4261 رەت ەفيرگە شىقتى. سونىمەن قاتار گازەتتەر مەن جۋرنالداردا 587 ماقالا جاريالاندى. سول سياقتى الەۋمەتتىك جەلىلەر مەن مەسسەندجەرلەردە سۋداعى قاۋىپسىزدىك ەرەجەلەرى بويىنشا 52 بەينەروليك ورنالاستىرىلىپ، كۇن سايىن كورسەتىلىپ جاتىر»، - دەدى باۋىرجان سىزدىقوۆ ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق، كوميتەت باسشىسىنىڭ مالىمدەۋىنشە، حالىق اراسىندا 120 مىڭنان استام جادىناما تاراتىلىپ، سۋ ايدىندارىندا 2 مىڭنان استام قاۋىپسىزدىك بەلگىلەرى ورناتىلدى.
«ازاماتتاردىڭ سۋداعى قاۋىپسىزدىگىن قامتاماسىز ەتۋ جانە توتەنشە جاعدايلاردىڭ الدىن الۋ شاراسى جوو-دا ۇيىمداستىرىلىپ جاتىر. وسى كۇنگە دەيىن 1،5 ملن ادامدى قامتىعان 854 ينتەراكتيۆتى ساباق جانە جيىن ءوتتى. ودان باسقا، «2GIS» كارتوگرافيالىق پلاتفورماسىندا (ءموبيلدى قوسىمشا) ەلىمىزدىڭ بارلىق وڭىرىندەگى سۋ ايدىندارىندا شومىلۋعا تىيىم سالىنعان (4994) جانە رۇقسات ەتىلگەن (490) ورىندار تۋرالى مالىمەتتەر ورنالاستىرىلدى»، - دەيدى ول.
بۇعان دەيىن ەلىمىز بويىنشا سۋعا شومىلۋعا رۇقسات بەرىلگەن 490 ورىننىڭ بارىن حابارلادىق.