قازاقستاندىقتار اتىنا نەشە تەلەفون ءنومىرى تىركەلگەنىن تەكسەرە الادى

بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ ايتتى.

Egov-تا ءبىر جسن بويىنشا تىركەلگەن ۇيالى تەلەفون نومىرلەرىنىڭ سانىن تەكسەرۋگە ارنالعان جاڭا قىزمەت قوسىلدى، دەپ حابارلايدى aqshamnews.kz

ءمينيستردىڭ ايتۋىنشا، بۇل مۇمكىندىك SIM-كارتانى زاڭسىز تىركەۋ ىس-قيمىلدارىمەن كۇرەسۋگە جاعداي جاسايدى.

"ەندى eGov جۇيەسىندە ءوزىڭىزدىڭ ءجسن-دى ەنگىزۋ ارقىلى اتىڭىزعا نەشە ۇيالى تەلەفون ءنومىرى تىركەلگەنىن وڭاي تەكسەرۋگە بولادى. ەگەر ناقتى پايدالانىپ وتىرعان نومىرلەر بويىنشا سايكەسسىزدىك بولسا، وندا ۇيالى بايلانىس وپەراتورىنا دەرەۋ حابارلاسىپ، قالعاندارىن بۇعاتتاي الاسىز"، - دەدى ۆەدومستۆو باسشىسى پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

سونداي-اق باسىلىمنىڭ جازۋىنشا، جاسلان مادييەۆ ءبىر ادامعا ساتىلاتىن SIM-كارتانىڭ سانىن شەكتەۋگە قاتىستى تۇسىنىك بەرگەن.

ءمينيستردىڭ سوزىنشە، باستاما ءقازىر ماجىلىستە تالقىلانىپ جاتىر.

"10 SIM-كارتادان ارتىق السا، جۇيەدە قاي ماقساتپەن بۇل SIM-كارتالاردى پايدالاناتىنى ايقىندالادى. كەيبىر كومپانيالار 100 شاقتى SIM-كارتانى ساتىپ الىپ، ءبىر قولعا بەرەتىنىن بىلەمىز"، - دەدى مادييەۆ.

ونىڭ ايتۋىنشا، وسى پروبلەمامەن كۇرەسۋ ءۇشىن مينيسترلىك ءتيىستى ۇسىنىستار دايىنداعان.

"ۇيالى بايلانىس وپەراتورلارىندا نومىرلەردى باسقا ماقساتتا پايدالانىپ جاتقانىن انىقتايتىن مۇمكىندىكتەرى بار. ماسەلەن، SIM-كارتانى تەك اۆتوكولىكتە پايدالانۋعا الىپ، وسى ءنومىردى باسقا ماقساتتا قولدانىپ جۇرسە، ونى ترافيك بويىنشا انىقتاۋ وڭاي. ماقساتسىز پايدالانعانى ءۇشىن جاۋاپكەرشىلىك قاراستىرالادى، ايىپپۇل سانكسياسى ەنگىزىلۋى مۇمكىن"، - دەدى جاسلان مادييەۆ.