2008 جىلدان بەرى ماماندار 60 مىڭ ناۋقاستى ەمدەپ، 40 مىڭنان استام وتا جاساعان.
قازاقستاننىڭ بارلىق ءوڭىرىنىڭ تۇرعىندارى استاناداعى ۇلتتىق نەيروحيرۋرگيا ورتالىعىندا قۇنى ميلليلون تەڭگەدەن اساتىن جوعارى تەحنولوگيالىق وتالاردى تەگىن جاساتا الادى، دەپ حابارلايدى Almaty-akshamy.kz
ورتالىقتىڭ مەديسينالىق ديرەكتورى اسىلبەك قالييەۆ قازاقستاندىقتاردىڭ جوعارى ساناتتاعى دارىگەرلەرگە قالاي ەمدەلە الاتىنىن ءتۇسىندىردى.
«15 جىلدا ەلىمىزدە بۇرىن-سوندى قولدانىلماعان 70-تەن استام جوعارى تەحنولوگيا ەنگىزىلدى. بۇرىن ناۋقاستارعا وتا جاساتۋ ءۇشىن شەتەلگە بارۋعا تۋرا كەلەتىن. وسى ورتالىق اشىلعاننان كەيىن مەديسينالىق كومەك قولجەتىمدى بولدى. قازىرگى كەزدە ناۋقاستاردىڭ نەيروحيرۋرگيا بويىنشا جوعارى تەحنولوگيالىق ەمدى تەگىن الۋعا مۇمكىندىگى بار. سالىستىرمالى تۇردە ەۋروپا، اقش ەلدەرىمەن سالىستىرساق، بىزدە ەمدەلۋ 10-20 ەسە ارزان»، دەدى ول.
سونداي-اق بىلتىر ۇلتتىق ورتالىقتا مەملەكەتتىك-الەۋمەتتىك مەديسينالىق ساقتاندىرۋ بويىنشا 4 مىڭنان استام پاسيەنت ەمدەلگەنىن اتاپ ءوتتى. ونىڭ 15 پايىزى جوعارى تەحنولوگيالىق مەديسينالىق قىزمەتتەردى قولدانا وتىرىپ جاسالعان وتالار. بيىلعى جىلدىڭ 5 ايىندا ورتالىققا مەدساقتاندىرۋ بويىنشا 1805 ناۋقاس ەمدەلدى. اتاپ ايتقاندا مي تامىرلارى، ومىرتقالاردىڭ اۋرۋلارى، ستەرەوتاكتيكالىق جۇيكەنى قولدانا وتىرىپ ميدىڭ نەيروستيمۋلياتورىن يمپلانتاسيالاۋ، پاركينسون اۋرۋى، ەپيلەپسيا جانە ت.ب. اۋرۋ تۇرلەرى.
«ءبىز دەنساۋلىق مينيسترلىگىنە باعىنىشتى مەملەكەتتىك مەكەمە سانالامىز. جەكە مەنشىك كلينيكا ەمەسپىز. بالكىم اكسيونەرلىك قوعام بولعان سوڭ با، كوبى ءبىزدىڭ ورتالىقتى جەكەمەنشىك دەپ ويلايدى. ورتالىقتا ەمدەلۋ ءۇشىن ناۋقاستار الدىمەن ءوز بەتىمەن كونسۋلتاسياعا كەلىپ، كومەك الا الادى. ەگەر ناۋقاستى ورتالىققا جاتقىزۋعا سەبەپتەر بولسا، دارىگەر قورىتىندى بەرىپ، جاتقىزىلاتىن كۇنىن بەلگىلەيدى. ەلىمىزدىڭ وڭىرلەرىندە تۇراتىن ناۋقاستار ءۇشىن ونلاين كونسۋلتاسيا بەرەتىن ارنايى ءبولىم جۇمىس ىستەيدى. وعان 6 مىڭنان استام ادام جۇگىنەدى، پروفيلىنە بايلانىستى اقپاراتتى بولىمشەلەرگە بولەدى. ەگەر سەبەپتەرى بولسا، ورتالىققا جاتقىزۋعا قورىتىندى بەرىلەدى. ناۋقاس ول قورىتىندىنى العان سوڭ، تۇرعىلىقتى جەرى بويىنشا ەمحاناعا بارىپ، قۇجاتتارى پورتالعا قويىلادى. جاتقىزۋ كۇنى اۆتوماتتى تۇردە بەلگىلەنەدى. بۇل ادامي فاكتوردى بولدىرماۋ ماقساتىندا جاسالدى. پورتالعا قويىلعان قۇجاتتار قابىلدانعان سوڭ، بەلگىلەنگەن كۇنى ناۋقاس استاناعا كەلەدى»، - دەپ تولىقتىردى ءسوزىن اسىلبەك قالييەۆ.
سونىمەن قاتار، ول نەيروحيرۋرگيالىق ورتالىقتا ەمدەلەتىن ناۋقاستاردىڭ جاسارىپ كەلە جاتقانىنا الاڭداۋشىلىق ءبىلدىردى.
«بۇرىن ارتەريالاردىڭ تارىلۋى دياگنوزى 70 تەن اسقان ازاماتتاردا كەزدەسەتىن. ءقازىر 20-25 جاستا قاتەرلىك ىسىكپەن كەلىپ جاتقاندار بار. تاياۋدا عانا 1973 جىلى تۋعان ازامات ارتەريالاردىڭ تارىلۋى دياگنوزىمەن ەم قابىلداپ كەتتى. ونىڭ فاكتورلارى وتە كوپ. مەنىڭ ويىمشا ءومىر ءسۇرۋ داعدىسى، ەكولوگيالىق فاكتور ءرول اتقارۋى مۇمكىن. سونداي-اق دياگنوستيكانىڭ قولجەتىمدىلىگى دە ماڭىزدى. 20 جىل بۇرىن جوعارى تەحنولوگيالىق دياگنوستيكانى جاساۋ مۇمكىن بولمايتىن. ءقازىر كەز كەلگەن ادام بارىپ كت مەن مرت جاساي الادى»، - دەدى دارىگەر.
ونىڭ ايتۋىنشا، قازاقستاندىقتار ورتالىق كورسەتەتىن بارلىق ەمدەۋ قىزمەتتەرىن تەگىن الا الادى. ول ءۇشىن مەديسينالىق ساقتاندىرۋ جۇيەسىنە قاتىسۋى كەرەك.
«ءبىزدىڭ ورتالىق قازاقستان ازاماتتارىنا ءماسم شەڭبەرىندە تەگىن قىزمەت كورسەتەدى. تەك ول ازامات مەديسينالىق ساقتاندىرۋ جۇيەسىنە قاتىسۋى كەرەك. ءوزى-وزى جۇمىسپەن قامتۋشى ازاماتتىڭ مەديسينالىق ساقتاندىرۋ جۇيەسىنە تولەپ وتىرعان سوماسى ونىڭ الاتىن قىزمەتىنىڭ قۇنىمەن سالىستىرعاندا وتە تومەن. ماسەلەن، مي تامىرىنا جاسالاتىن وتانىڭ ءبىر ءتۇرىنىڭ قۇنى ءبىر ناۋقاس ءۇشىن 4-6 ملن تەڭگەنىڭ ارالىعىندا تۇرادى. اي سايىن 3 مىڭنان ءسال اساتىن سومانى تولەپ، قازاقستاندىقتار قۇنى بىرنەشە ميلليون تۇراتىن جوعارى تەحنولوگيالىق وتانى جاساتۋعا بولادى. سول سياقتى گامما پىشاق تەحنولوگياسى بويىنشا وتا شەتەلدىكتەر ءۇشىن 1،5 ملن تەڭگە تۇرسا، ءمامس جۇيەسىنە قاتىساتىن قازاقستاندىقتار ءۇشىن ول تەگىن»، - دەپ قوستى قالييەۆ.
الەۋمەتتىك مەديسينالىق ساقتاندىرۋ قورىنىڭ زاڭدى جانە جەكە تۇلعالارمەن جۇمىس دەپارتامەنتىنىڭ ديرەكتورى زابيرا ورازالييەۆانىڭ ەلىمىزدە جوعارى تەحنولوگيالىق وپەراسيالاردىڭ قۇنى قىمبات تۇراتىنىن اتاپ ءوتتى.
مامس-كە قاتىسىپ، ساقتاندىرىلعان مارتەبەسى بار كەز كەلگەن ازاماتتىڭ ءوزى تىركەلگەن ەمحانادان جولداما الىپ، جوسپارلى تۇردە پورتال ارقىلى ەمدەلۋىنە مۇمكىندىك بار. جالپى جوعارى تەحنولوگيالىق وپەراسيالار وتە قىمبات بولىپ تابىلادى. بىلتىرعى جىلدىڭ ستاتيستيكاسىن قارايتىن بولساق، 2 مىڭعا جۋىق جوعارى تەحنولوگيالىق مەديسينالىق كومەك كورسەتىلگەن. ونىڭ 1،5 مىڭى ءمامس ارقىلى جاسالىپ وتىر. بيىل 500-گە جۋىق مۇنداي كومەك كورسەتىلدى، ونىڭ 400 ساقتاندىرۋ جۇيەسىندە كورسەتىلدى، - دەدى ول.
جالپى، 2022 جىلى ەلىمىزدەگى تاۋلىك بويى جۇمىس ىستەيتىن ستاسيونارلاردا قازاقستاندىقتار 452،5 ملرد تەڭگەگە 1،9 ملن جاعداي بويىنشا ەمدەلگەن. ونىڭ ىشىندە 1،5 ملن جاعدايعا قىزمەت ءمامس ەسەبىنەن كورسەتىلدى.
ايتا كەتەيىك، جالپى قازاقستاندا نەيروحيرۋرگيالىق وتالاردىڭ ءقۇنى قىمبات تۇرادى. ونىڭ سەبەبى وعان قاجەتتى ماتەريالداردىڭ كوبى شەتەلدەن اكەلىنەدى. ىسىكتەردى الۋ وتاسى 1 ملن تەڭگەگە دەيىن تۇرسا، جوعارى تەحنولوگيالىق وتالاردىڭ ەڭ ارزانى 1 ملن تەڭگەدەن باستالادى. ماسەلەن، پاركينسون وپەراسياسىنىڭ قۇنى 5 ملن تەڭگەگە دەيىن بارادى.
سونىمەن بىرگە جۋرناليستەرگە گامما-پىشاق اپپاراتى تانىستىرىلدى. بۇل اپپاراتتى ۇلتتىق ورتالىق ونى 2021 جىلى ساتىپ العان. ول ساۋلەنىڭ كومەگىمەن قاتەرلىك ىسىكتەرگە وتا جاساپ، ەمدەۋگە مۇمكىندىك بەرەدى. ازىرگە ول ەلىمىزدەگى جالعىز اپپارات.