قازاقستاندىقتار الەم بويىنشا جاڭا كولىك ساتىپ الۋدان قالىسپايدى

قازاقستاندا جاڭا اۆتوكولىكتەر ساتىلىمىنىڭ ءوسىمى الەمدىك ورتاشا كورسەتكىشتەن 6 ەسە جوعارى.

Finprom.kz پورتالىنىڭ  مالىمەتىنشە، وسى جىلدىڭ العاشقى بەس ايىنىڭ قورىتىندىسى الەمدىك اۆتوونەركاسىپ ءىس جۇزىندە قالپىنا كەلگەنىن سەنىمدى تۇردە كورسەتىپ وتىر. 2023 جىلدىڭ قاڭتار-مامىرىندا الەم بويىنشا 34،8 ملن جاڭا اۆتوكولىك ساتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.

بۇل 2022 جىلدىڭ قاڭتار-مامىرىمەن سالىستىرعاندا 10،5 پايىزعا جوعارى. الەمدە ءاربىر ءۇشىنشى جاڭا كولىك قىتايدا ساتىلعان – 10،4 ملن اۆتوكولىك، ءبىر جىلدا 10،5 پايىزعا ارتقان. ودان كەيىن اقش (6،3 ملن اۆتوكولىك) جانە باتىس ەۋروپا (5،4 ملن اۆتوكولىك) ەلدەرى تۇر.

بىلتىرعىمەن سالىستىرعاندا جاپونيادا جاڭا كولىك ساتىلىمى ايتارلىقتاي ءوستى: 17،5 پايىزعا ارتىپ، 2023 جىلدىڭ قاڭتار-مامىر ايلارىندا 2 ملن بولدى. ودان كەيىنگى ورىندا شىعىس ەۋروپا، ونىڭ ىشىندە تۇركيا (16،4%) جانە باتىس ەۋروپا (16،3%) تۇر. بۇل رەتتە كورشىلەس رەسەيدە بيىل قاڭتار-مامىردا بار بولعانى 225،5 مىڭ جاڭا كولىك ساتىلعانىن اتاپ وتكەن ءجون. بۇل بىلتىرعى سايكەس كەزەڭمەن سالىستىرعاندا 26 پايىزعا از.

الەم بويىنشا العاندا قازاقستاندا احۋال جاقسىراق. بيىل قاڭتار-مامىردا ساتىلىم 66،3 مىڭ جاڭا اۆتوكولىككە جەتتى. كورسەتكىش 2022 جىلدىڭ قاڭتار–مامىر ايلارىمەن سالىستىرعاندا بىردەن 65،8 پايىزعا كوتەرىلدى. سونىمەن قاتار ەكىنشى اي قاتارىنان ءبىر ايداعى رەكوردتىق كورسەتكىش تىركەلىپ وتىر. بيىل مامىردا 14،7 مىڭ جاڭا كولىك ساتىلدى. بۇل قازاقستاندىقتاردىڭ اۆتوسالوندارداعى كەزەكپەن قوشتاسقانىن كورسەتەدى.