الەۋمەتتىك جەلىلەردە 31 جەلتوقساندى رەسمي دەمالىس كۇنى دەپ جاريالاۋ تالقىلادى، - دەپ حابارلايدى aqshamnews.kz
قازاقستاندىقتار نە دەيدى؟
جەلى قولدانۋشىسى جازبا جاريالاپ، بۇل ماسەلەگە قاتىستى قازاقستاندىقتاردىڭ پىكىرىن سۇراعان.
"كىم 31 جەلتوقساندى دەمالىس كۇنى دەپ جاريالاۋدى قولدايدى؟ نەگىزى ءبارىبىر ەشكىم جۇمىس ىستەمەيدى، جۇمىستا جاي وتىرامىز، ال ۇيدە ىستەيتىن شارۋا، دايىندىق بار"، - دەپ جازدى اۆتور.
31 جەلتوقساننىڭ مارتەبەسى تۋرالى پىكىرتالاس تولاستار ەمەس. ءبىرى مەرەكەگە سابىرمەن دايىندالۋ ءۇشىن قوسىمشا دەمالىس كۇنىن سۇراسا، ەكىنشىلەرى دارىگەرلەر، كولىك، دۇكەندەر مەن جەدەل قىزمەتتەر جۇمىس ىستەۋى ءتيىس ەكەنىن ەسكە سالادى.
ەڭبەك مينيسترلىگىنىڭ ۇستانىمى
بۇعان دەيىن ەڭبەك جانە حالىقتى الەۋمەتتىك قورعاۋ مينيسترلىگىنە رەسمي ساۋال جولداعان ەدىك. ۆەدومستۆو 31 جەلتوقسان مەملەكەتتىك مەرەكەلەر تىزىمىنە كىرمەيتىنىن ەسكە سالدى.
مينيسترلىك تۇسىندىرمەسى:
قازاقستاندا دەمالىس كۇندەرى تەك مەملەكەتتىك جانە ۇلتتىق مەرەكەلەر بولىپ سانالادى. جاڭا جىل 1 جانە 2 قاڭتاردا تويلانادى؛
جۇمىس بەرۋشىلەر 31 جەلتوقسانداعى جۇمىس كۇنىن ءوز قالاۋى بويىنشا قىسقارتا الادى؛
31 جەلتوقساندى رەسمي دەمالىس كۇنى ەتۋ ءۇشىن زاڭعا وزگەرىس ەنگىزىپ، بۇل ماسەلەنى ۇكىمەت دەڭگەيىندە قاراستىرۋ قاجەت.
"ازاماتتاردىڭ دەمالىسقا كونستيتۋسيالىق قۇقىعىن ساقتاۋ جانە جۇمىسپەن قامتىلعان حالىقتىڭ باسىم بولىگىنىڭ الەۋمەتتىك مۇددەلەرىن ەسكەرۋ ماقساتىندا 31 جەلتوقساندى دەمالىس كۇنى رەتىندە بەكىتۋ ورىندى ەمەس دەپ سانايمىز"، دەلىنگەن جاۋاپتا.
سونىمەن قاتار مينيسترلىك دەمالىس كۇندەرىن اۋىستىرۋ مۇمكىن ەكەنىن، ءبىراق مۇنداي شەشىمدەر كۇنتىزبە مەن ەكونوميكالىق جاعدايعا بايلانىستى الدىن الا قابىلداناتىنىن ناقتىلادى.