زەينەتكەرلەر سانى 2 ملن 246 مىڭنان استام ادامدى قۇرايدى.
جىل باسىنان بەرى قازاقستان ۇكىمەتى ەكى ميلليوننان استام ادامعا 470 ملرد تەڭگەدەن استام زەينەتاقى تولەگەن، دەپ حابارلايدى Almaty-akshamy.kz.
«1 ناۋرىزداعى جاعداي بويىنشا، قازاقستاندىقتارعا 470،1 ملرد تەڭگەدەن استام سوماعا زەينەتاقى تولەندى. 2022 جىلعى اقپاندا رەسپۋبليكالىق بيۋدجەتتەن زەينەتاقى تولەمدەرىنە 235،4 ملرد تەڭگەدەن استام، ونىڭ ىشىندە بازالىق زەينەتاقىنى تولەۋگە 71،6 ملرد تەڭگە، ىنتىماقتى زەينەتاقىنى تولەۋگە 163،8 ملرد تەڭگە ءبولىندى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
2022 جىلعى 1 ناۋرىزداعى جاعداي بويىنشا، زەينەتكەرلەر سانى 2 ملن 246 مىڭنان استام ادامدى قۇرايدى.
2022 جىلعى 1 ناۋرىزداعى جاعداي بويىنشا، زەينەتاقى تولەمدەرىنىڭ ورتاشا مولشەرى (بازالىق زەينەتاقى تولەمىن ەسكەرە وتىرىپ) 105 538 تەڭگەنى قۇرادى.
2018 جىلعى 1 شىلدەدەن باستاپ مەملەكەتتىك بازالىق زەينەتاقى تولەمى، زەينەتاقى جۇيەسىندەگى تاجىريبەسىن ەسكەرە وتىرىپ، ءار الۋشىعا جەكە تاعايىندالعانىن ەسكە سالايىق.
بۇل رەتتە 1998 جىلعى 1 قاڭتارداعى جاعداي بويىنشا، ىنتىماقتى جۇيەدە جۇمىس ىستەگەن ۋاقىتى، سونداي-اق مىندەتتى زەينەتاقى جارنالارى تولەنگەن كەزەڭدەر زەينەتاقى جۇيەسىندەگى ەڭبەك وتىلىنە قوسىلادى.
سونىمەن، ەگەر زەينەتاقى جۇيەسىندەگى جۇمىس ءوتىلى 10 جىل نەمەسە ودان از بولسا، سونداي-اق ەگەر مۇلدە جوق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ 54%-ىن قۇرايدى، سودان كەيىن 10 جىلدان اسقان ءار جىل ءۇشىن ونىڭ مولشەرى 2%-عا ارتادى. مىسالى، ەگەر ءسىز 20 جىل قاتىسساڭىز، بازالىق زەينەتاقى كۇنكورىس دەڭگەيى قۇنىنىڭ 74%-دى، 30 جىل – كۇنكورىس قۇنىنىڭ 94%-ىن قۇرايدى. 33 جانە ودان دا كوپ جىل جۇمىس ءوتىلى بولسا، كۇنكورىس قۇنىنىڭ 100% جوعارى مولشەرىندە بەلگىلەنەدى.
ەگەر ءبىر اي ىشىندە مزج ءبىرىڭعاي جيناقتاۋشى زەينەتاقى قورىنا بىرنەشە رەت جاسالسا، جيناقتاۋشى جۇيەگە قاتىسۋ مەرزىمى ءبىر ايدى قۇرايدى.
وسىلايشا، مىندەتتى زەينەتاقى جارنالارى نەعۇرلىم تۇراقتى جانە تولىق سالىناتىن بولسا، زەينەتاقى جاسىنا جەتكەندە، بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.
ءوز كەزەگىندە جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدە الىنعان ورتاشا ايلىق تابىسقا بايلانىستى بولادى.