زاڭگەر المالى اۋداندىق سوتىنا شاعىم ءتۇسىردى.
زاڭگەر جانگەلدى سۇلەيمانوۆ قازاق حالقىنا دورەكى تۇردە اشىق قوقان-لوققى كورسەتكەن رەسەيلىك جۋرناليست تيگران كەوساياندى سوتقا بەردى. بۇل تۋرالى ول Facebook-تەگى پاراقشاسىندا جازدى دەپ حابارلادى Almaty-akshamy.kz.
زاڭگەردىڭ سوزىنشە، كەوسايان ايتقان سوزدەرى ءۇشىن زاڭ الدىندا جاۋاپ بەرۋى كەرەك، ال قازاقتار ءۇنسىز قالماۋى كەرەك.
«كەوسايان بۇكىل حالقىمىزدىڭ نامىسىنا ءتيدى، ول ءسوزسىز. بۇل ىستەگى ۇستانىمى ءۇشىن سىرتقى ىستەر مينيسترلىگىنە راحمەت. ءبىراق قازاقتار دا جاۋاپ بەرۋى كەرەك. زاڭعا سايكەس، جاۋاپ بەرۋشى شەتەلدىك ازامات بولسا دا، مۇنداي ىستەر بويىنشا قازاقستان سوتىنا ارىزدانۋعا بولادى.كەشە مەن الماتى قالاسى، المالى اۋداندىق سوتىنا وسىنداي شاعىم ءتۇسىردىم. سوتتان سۇرايتىنىم تەك ءبىر نارسە. كەوسايان ايتقان ءسوزىن تەرىسكە شىعارىپ، يۋتۋب ارناسىنا جاڭا ۆيدەو جاريالاسىن. ودان باسقا ەشتەڭە قاجەت ەمەس»، – دەپ جازدى زاڭگەر.
ەسكە سالساق، الەۋمەتتىك جەلىدە رەسەيلىك جۋرناليست كەوساياننىڭ ەلىمىزدە جەڭىس كۇنىنە وراي اسكەري پارادتىڭ بولماۋىنا بايلانىستى پىكىر ايتقان ۆيدەوسى تارادى. ۆيدەودا جۋرناليست دورەكى تۇردە قازاقتارعا ۋكرايناداعى شيەلەنىسكە بايلانىستى ءبىرجاقتى شەشىمگە كەلۋ كەرەك ەكەندىگىن ايتىپ، قاڭتار وقيعاسى كەزىندەگى رەسەيلىكتەردىڭ كومەگى تۋرالى دا ەسكە الدى.