قازاقستاندىق تەننيسشى الەكساندر بۋبليك «ۇلكەن دۋلىعانىڭ» ءۇش دۇركىن چەمپيونىن ۇتتى

شەشۋشى پارتيانى قازاقستاندىق سپورتشى برەيكپەن ءتامامدادى – 6:2.

قازاقستاننىڭ ءبىرىنشى، الەمنىڭ 36-راكەتكاسى الەكساندر بۋبليك مونتە-كارلو ATP Masters 1000 ءتۋرنيرىن جەڭىسپەن باستادى، دەپ حابارلايدى Almaty-akshamy.kz Olympic.kz cىلتەمە جاساپ.

قازاقستاندىق تەننيسشى العاشقى اينالىمدا الەمنىڭ بۇرىنعى ءۇشىنشى راكەتكاسى، قازىرگى كەزدە رەيتينگتە 236-ورىندا تۇرعان «ۇلكەن دۋلىعا» ءتۋرنيرىنىڭ ءۇش دۇركىن جەڭىمپازى، شۆەيساريالىق ستەن ۆاۆرينكامەن كەزدەستى. جاراقاتىنا بايلانىستى كوپتەن بەرى ويناماعان 37 جاستاعى شۆەيساريالىق سپورتشىنىڭ بۇل سوڭعى 12 ايداعى ەكىنشى ويىنى ەدى. ءبىرىنشى پارتيانى الەكساندر برەيكپەن باستاعانىمەن، ۆاۆرينكا كۇش الىپ كەتتى – 6:3. ەسەسىنە ەكىنشى سەتتە بۋبليك ەسە قايىردى – 7:5. شەشۋشى، ءۇشىنشى، پارتيانى قازاقستاندىق سپورتشى برەيكپەن ءتامامدادى – 6:2.

بۋبليك جالپى جۇلدە قورى 5،8 ملن ەۋروعا باعالانعان ماستەرس جارىسىنىڭ ءۇشىنشى اينالىمىنا شىعۋ ءۇشىن الەمنىڭ 19-راكەتكاسى، يسپانيالىق پابلو كاررەنو-بۋستا نەمەسە رەيتينگتە 66-ساتىداعى ارگەنتينالىق سەباستيان باەستىڭ بىرەۋىمەن تالاسادى.